Dokumentari “Ozzy Osbourne: Coming Home” ishte planifikuar të shfaqej në BBC One më 18 gusht, në orën 21:00, por u hoq nga programi disa orë më parë.
“Ngushëllimet tona janë për familjen Osbourne në këtë kohë të vështirë. Po respektojmë dëshirën e familjes për të pritur edhe pak para se të transmetohet ky projekt filmik shumë i veçantë. Data e re e transmetimit do të konfirmohet së shpejti”, thuhet në deklaratën e BBC-së.
Asnjë arsye konkrete nuk u dha fillimisht për shtyrjen, por dokumentari trajton rikthimin e këngëtarit në Britani, koncertin e tij të lamtumirës në korrik dhe vdekjen në moshën 76-vjeçare, po atë muaj.
BBC ka sqaruar të hënën se filmi ishte “lëvizur në skemën programore” dhe u zëvendësua me një episod të emisionit “Fake Or Fortune?”.
Fillimisht dokumentari ishte konceptuar si një seri me 10 pjesë me titullin “Home to Roost”, që do të ndiqte Ozzyn dhe bashkëshorten e tij, Sharon, gjatë përpjekjes për të filluar një jetë të re në Buckinghamshire. Por, derisa gjendja shëndetësore e Ozzyt u përkeqësua, projekti u shndërrua në një film njëorësh që pasqyron tre vjetët e fundit të jetës së tij.
BBC-ja e kishte përshkruar dokumentarin si “rrëfim prekës dhe frymëzues për kapitullin e fundit të jetës së Ozzyt, i treguar përmes qasjes së veçantë dhe intime te e gjithë familja Osbourne, përfshirë Sharon, Jack dhe Kelly”.
Megjithatë, transmetimi ishte planifikuar të ndodhte më pak se një muaj pas vdekjes së tij dhe më pak se tre javë pasi Sharon dhe fëmijët e tyre u shfaqën të përlotur para turmave në qytetin e tij të lindjes, Birmingham, në prag të varrimit.
