I njohur dikur si “stacioni i trenit më i pafat i Evropës” dhe “Titaniku i Pirenejve”, Stacioni Ndërkombëtar i Canfranc, i fshehur thellë në malet e Spanjës veriore, ka rilindur nga hiçi. Ky gjigant me një fasadë 200 metra të gjatë është transformuar në një hotel luksoz me pesë yje, duke shënuar një kapitull të ri në historinë e tij të gjatë dhe plot peripeci.
Hapur me bujë në vitin 1928, stacioni ishte menduar të ishte një qendër e rëndësishme tranziti ndërkufitar mes Spanjës dhe Francës. Megjithatë, fati i tij u godit shpejt nga fatkeqësitë, duke përfshirë një zjarr, Luftën Civile Spanjolle dhe Luftën e Dytë Botërore, ku shërbeu si një pikë e fshehtë kontrabande për refugjatët. Rënia e plotë erdhi në vitin 1970, kur një aksident shkatërroi një urë kyçe, duke e lënë stacionin të braktisur për dekada.
Historia shndërrohet në luks
Sot, stacioni i dikurshëm është kthyer në një destinacion turistik. Hotei i ri, i operuar nga grupi Barcelo, ofron 104 dhoma, një pishinë të brendshme, spa dhe një restorant me yll Michelin, i quajtur “Canfranc Express”, që shërben kuzhinë lokale brenda një vagoni të restauruar treni. Stafi i hotelit vesh uniforma të frymëzuara nga vitet 1920, duke ndihmuar në rikrijimin e një atmosfere nostalgjike të udhëtimeve të mëparshme.
Vizioni për të ardhmen
Rilindja e stacionit është vlerësuar si një mrekulli për rajonin. Pilar Alfaro, zëvendësmenaxherja e hotelit, thekson se ky projekt jo vetëm ka ruajtur një thesar kombëtar, por ka rigjallëruar edhe ekonominë lokale, duke rritur turizmin në zonën e qetë malore.
Dhe ka më shumë optimizëm në horizont. Me mbështetjen e Bashkimit Evropian, janë duke u bërë plane për të rindërtuar plotësisht linjën hekurudhore ndërkombëtare mes Zaragozës dhe Pau, me një rihapje të mundshme në vitin 2028. Kjo do t’i mundësojë udhëtarëve të arrijnë sërish në këtë vend historik me tren, duke e kthyer Canfranc-un në një destinacion magjik udhëtimi, ashtu siç ishte menduar të ishte një shekull më parë.
