Këngët e saj kanë pushtuar skenat më prestigjioze të botës, por këtë herë sopranoja e madhe shqiptare, Ermonela Jaho, kthehet në vendlindje për të sjellë një emocion të veçantë: një koncert madhështor në kalanë historike të Kaninës.
Në krah të Orkestrës Simfonike të RTSH, me të cilën Jaho thotë se është rritur, ajo po përgatitet t’i dhurojë publikut shqiptar një natë të paharrueshme nën dirigjimin e maestros Jacopo Sipari.
Në provat me Orkestrën, Jaho e cilësoi këtë bashkëpunim si një nga më të dashurit.
“Të kthehesh mbas shumë vitesh, që kur kam qenë e vogël e deri tani, dhe të kthehesh me kolegë, me artistë të jashtëzakonshëm, me Orkestrën e Radio Televizionit… Unë jam rritur me Orkestrën e Radio Televizionit, që e vogël, që në Pallatin e Pionierëve, kështu që është një kthim në origjinë, por me eksperiencën që kemi, eksperiencën e jetës dhe eksperiencën profesionale dhe pikërisht në kalanë e Kaninës. Do të jetë diçka magjike dhe shpresoj që publiku ta perceptojë, ta ndiejë këtë lloj emocioni,” thotë sopranoja.
Programi i mbrëmjes do të sjellë një udhëtim muzikor plot ndjesi, ku përkrah Jahos do të ngjiten edhe tenori Saimir Pirgu dhe aktori i shquar Timo Flloko, ndërsa të ftuarit specialë do të shtojnë magjinë e këtij eventi unik.
“Do të këndoj nga opera ‘Manon Lescaut’ [nga Giacomo Puccini]. Do të këndoj nga Adriana Lecouvreur [nga Francesco Cilea], një arie tjetër, pastaj ‘O mio babino caro’ [Puccini], domethënë një repertor i operës klasike. Do të këndoj me Saimir Pirgun, kolegun tim, bashkatdhetarin tim dhe artist i jashtëzakonshëm,” shprehet artistja.
Jaho ndau gjithashtu projektet e reja që e presin nga Shqipëria e deri në Amerikë dhe Europë.
“Do të karikohem mirë me energji, sepse kam nevojë për këtë energjinë pozitive. Kthehem përsëri në Nju-Jork. Kam një koncert këtu në Teatrin e Operës dhe Baletit. Pastaj shkoj në Madrid për një operë të [Pietro] Mascagni, ‘Iris’. Pastaj në Londër e të tjera… Por e jetoj çdo moment, çdo ditë sikur është dita e fundit si artiste dhe dua të jap më të mirën time,” thekson sopranoja.
Mos e humbisni këtë ngjarje më 31 gusht në Kaninë, aty ku muzika, historia dhe arti do të bashkohen në një mbrëmje të jashtëzakonshme.
