Fluksi i migrantëve të paligjshëm ishte një nga arsyet kryesore për Brexit-in. Por pesë vjet pas largimit nga BE-ja, Britania përballet me ‘rrënojat’ e politikës së saj të migracionit.
Mbretëria e Bashkuar është e dëshpëruar si për imigracionin e paligjshëm, ashtu edhe për atë të ligjshëm.
Vetëm të shtunën, më shumë se 1000 migrantë të paligjshëm mbërritën në Mbretërinë e Bashkuar me anije nga Franca. Në total, numri në vitin 2025 është më shumë se 30 mijë, një rritje prej 37 për qind e krahasuar me vitin e kaluar.
Qeveria raporton se viti 2024 do të shohë “nivelin më të lartë të kërkesave për azil, që nga fillimi i mbajtjes së të dhënave në vitin 1979, me pothuajse dyfishin e aplikantëve sesa në vitin 2021, informon BILD.
Kurse këtë vit, vendi synon të thyejë rekordin e azilit të vitit të kaluar. Deri në fund të qershorit 2025, vendi regjistroi 111,084 azilkërkues, një rritje prej 14 për qind krahasuar me vitin e kaluar. Mes tyre edhe shumë shqiptarë.
Dhe nuk janë vetëm refugjatët që po shkaktojnë probleme për vendin. Britanikët kanë humbur edhe kontrollin mbi migrimin e ligjshëm.
Midis viteve 2022 dhe 2024, “më shumë njerëz emigruan ligjërisht në Britaninë e Madhe sesa në Amerikë”, raporton gazeta britanike “Telegraph”. Kjo pavarësisht faktit se SHBA-të kanë pesë herë më shumë popullsi dhe 40 herë më shumë sipërfaqe.
Gazeta citon një profesor londinez dhe ekspert të migracionit i cili ka thënë:
“Mendoj se do të duhet të kthehesh 150 ose 200 vjet prapa për të gjetur një rritje kaq të shpejtë të popullsisë jashtë kohës së luftës”.
Sipas Ëall Street Journal, rreth 4.5 milionë njerëz, kryesisht indianë, nigerianë dhe kinezë, kanë ardhur në Mbretërinë e Bashkuar që nga viti 2021. Kjo përfaqëson rreth katër për qind të popullsisë së përgjithshme.
Mediat britanike e kanë identifikuar reformën e madhe të migracionit të ish-kryeministrit Boris Johnson, si arsyen e humbjes së kontrollit. Fituesi konservator i Brexit donte të fuste një sistem modern pikësh për të tërhequr specialistë të kualifikuar në vend dhe për të zëvendësuar humbjen e punëtorëve evropianë.
Por kjo pati efekt të kundërt. Erdhën shumë më tepër njerëz sesa pritej: Britanikët lëshuan qindra mijëra viza për punëtorë me kualifikim të ulët nga India, Pakistani, Nigeria, Filipinet dhe Zimbabveja, të cilët u zhvendosën në Mbretërinë e Bashkuar me familjet e tyre.
Falë krizës së migracionit, Britania e Madhe është në gjendje të jashtëzakonshme. Konservatorët u votuan për rrëzimin e pushtetit në vitin 2024 me një humbje shkatërruese. Por edhe qeveria e majtë laburiste e Keir Starmer nuk është në gjendje të kontrollojë numrin e azilkërkuesve.
Tani, azilkërkuesit do të zhvendosen nga hotelet në ish-kazermat ushtarake – një reagim ndaj demonstratave nga britanikët e zemëruar. Ndërkohë, partia e ekstremit të djathtë “Reform UK” e Nigel Farage, po i kryeson sondazhet.
