Presidenti i Izraelit, Isaac Herzog, ka thënë se është grindur të mërkurën me kryeministrin britanik, Keir Starmer, gjatë një takimi “të ashpër” të zhvilluar në Londër, ku dolën në pah mosmarrëveshje të thella rreth sjelljeve të fundit të dy vendeve.
Takimi mes dy udhëheqësve u mbajt një ditë pasi Izraeli i zgjeroi sulmet kundër Hamasit duke kryer një sulm ajror që për qëllim e kishte vrasjen e udhëheqësve politikë të këtij grupi në Katar, shtet aleat i Britanisë në Lindjen e Mesme. Kryeministri britanik e ka dënuar këtë veprim të Izraelit, raporton agjencia e lajmeve “Reuters”.
Izraeli është zemëruar nga planet e Britanisë për t’iu bashkuar disa shteteve perëndimore, përfshirë Francën e Kanadanë, për të njohur një shtet palestinez këtë muaj, nëse Izraeli nuk plotëson disa kushte, përfshirë armëpushimin në Gaza.
“U thanë gjëra që ishin të ashpra e të forta dhe sigurisht se ne mund të grindemi, sepse kur aleatët takohen, ata mund të grinden. Ne të dyja [vendet] jemi demokraci” – tha më vonë një në tubim presidenti izraelit.
Sipas tij, plani i kryeministrit Starmer për ta njohur shtetësinë palestineze dhe pikëpamjet e tij rreth ndihmave humanitare në Gaza ishin rrënjët e mosmarrëveshjes dhe shtoi se e kishte ftuar Qeverinë e Britanisë për të ndërmarrë një mision të zbulimit të fakteve në Izrael.
Në anën tjetër, zyra e Starmerit tha se kryeministri britanik kërkoi nga Herzogu që ta ndryshonte rrjedhën sa i përket Gazës, duke shprehur shqetësim të thellë për krizën humanitare dhe duke e shtyrë Izraelin që ta lejojë futjen e ndihmave dhe t’i ndërpresë operacionet sulmuese në enklavë.
Starmeri ripohoi se Britania dhe Izraeli janë aleatë të vjetër dhe tha se ai mbetet i përkushtuar për të punuar drejt paqes së qëndrueshme për izraelitët e palestinezët.
Më herët, dy udhëheqësit i shtrënguan duart shkurt e pa buzëqeshje në hyrje të ndërtesës qeveritare britanike para se të hynin në të.
Në takimin me presidentin izraelit, Starmeri gjithashtu e ngriti çështjen e sulmit ajror izraelit në Katar, duke e cilësuar incidentin “tërësisht të papranueshëm”.
“Ai tha se sulmet ishin shkelje flagrante e sovranitetit të një partneri kyç dhe nuk bëjnë asgjë për ta siguruar paqen që ne të gjithë dëshpërimisht duam ta shohim” – tha një zëdhënës qeveritar britanik.
Lufta në Gaza i ka tensionuar raportet e Izraelit me Britaninë e me vende të tjera evropiane. Britania ua ka bllokuar zyrtarëve izraelitë pjesëmarrjen në panairin e saj më të madh tregtar të mbrojtjes që do të mbahet këtë javë./Nacionale
