Shtetet e Bashkuara kanë pezulluar pa afat Dialogun Strategjik të planifikuar me Kosovën.
Sipas një njoftimi në llogarinë në Facebook të ambasadës amerikane në Kosovë, ky vendim është marrë “për shkak të shqetësimeve mbi veprimet e qeverisë në detyrë të cilat kanë rritur tensionet dhe paqëndrueshmërinë, duke kufizuar aftësinë e Shteteve të Bashkuara për të bashkëpunuar në mënyrë produktive me Kosovën mbi prioritetet e përbashkëta”.
“Ne mbetemi të përkushtuar në avancimin e interesave të përbashkëta mes Shteteve të Bashkuara dhe popullit të Kosovës.
Marrëdhënia jonë me Kosovën bazohet mbi një qëllim të përbashkët: forcimin e paqes dhe stabilitetit si bazë për mirëqenie të ndërsjellë ekonomike. Për fat të keq, veprimet dhe deklaratat e fundit të Kryeministrit në detyrë Kurti kanë paraqitur sfida për progresin e arritur ndër vite.
Dialogu strategjik kishte për qëllim forcimin e lidhjeve ekonomike dhe diplomatike, në të mirë të popullit amerikan dhe atij kosovar.
Shpresojmë që të ndjekim këto përpjekje në të ardhmen, kur të jetë e përshtatshme. Ne e dimë se ky është një qëllim i prioritizuar nga populli i Kosovës”.
