Shefja politike e OKB-së, Rosemary DiCarlo, gjatë një takimi në Këshillin e Sigurimit theksoi ditën e sotme se nuk është hera e parë që dronët rusë janë parë përtej kufijve të Ukrainës, “por është hera e parë që disa dronë kanë fluturuar kaq thellë në hapësirën ajrore të një vendi fqinj.”
DiCarlo theksoi se OKB-ja nuk ka mundësi të verifikojë pretendimet apo kundërpretendimet rreth incidentit dhe mund të mbështetet vetëm në informacionet publike.
Sipas Polonisë, 19 dronë rusë hynë në hapësirën e saj ajrore gjatë natës së 9 dhe 10 shtatorit, gjatë një sulmi të madh me raketa dhe dronë ndaj Ukrainës. Autoritetet polake thanë se disa dronë u rrëzuan paraprakisht dhe mbetjet u gjetën në pjesë të qendrës dhe lindjes së vendit.
Ky episod shënoi herën e parë që aleatët e NATO-s përdorën forcën për të neutralizuar këta dronë.
Autoritetet polake raportuan mbyllje të përkohshme të aeroporteve në Varshavë dhe Rzeszów, si dhe kufizime në trafikun ajror në lindje të vendit. Nuk u raportuan viktima, por disa zona rezidenciale në fshatra pësuan dëme.
Ministria ruse e Mbrojtjes pranoi kryerjen e sulmeve ndaj caqeve ukrainase gjatë të njëjtës periudhë, por tha se nuk kishte synim të godiste asnjë objektiv në Poloni. Bjellorusia raportoi se disa dronë u devijuan nga masat ukrainase të mbrojtjes dhe dolën jashtë kursit, duke shtuar se kishte njoftuar vendet fqinje kur dronët iu afruan hapësirës së tyre ajrore.
Polonia aktivizoi Nenin 4 të Traktatit të Atlantikut të Veriut (Traktati i NATO-s) pas incidentit, duke nxitur konsultime urgjente mes 32 shteteve anëtare të paktit të sigurisë evropiane.
Brifingu u zhvillua në sfondin e sulmeve të vazhdueshme ruse në të gjithë Ukrainën. Presidenti Volodymyr Zelenskyy tha se mbi 400 dronë dhe 40 raketa lundruese dhe balistike u lëshuan në 15 rajone më 9 dhe 10 shtator, duke shkaktuar viktima civile, përfshirë të paktën një në kryeqytetin Kyiv.
Znj. DiCarlo vuri në dukje edhe koston e luftës në Rusi dhe në rajonet e Ukrainës të okupuara nga Rusia. Ajo rikujtoi Këshillin se sulmet ndaj civilëve dhe infrastrukturës civile, kudo që ndodhin, janë të ndaluara sipas ligjit ndërkombëtar humanitar dhe duhet të ndalojnë.
“Ngjarjet e kësaj jave nënvizojnë ndikimin e rrezikshëm të kësaj lufte në sigurinë e rajonit dhe rrezikun e përshkallëzimit. Prandaj, ne edhe një herë bëjmë thirrje urgjente për një armëpushim të plotë, të menjëhershëm dhe të pakushtëzuar në Ukrainë. Gjendja përfundimtare duhet të jetë një paqe e drejtë, gjithëpërfshirëse dhe e qëndrueshme, në përputhje me Kartën e OKB-së, ligjin ndërkombëtar dhe rezolutat përkatëse të OKB-së”, u shpreh ajo.
