Në prag të rinisjes së seancave gjyqësore ndaj ish-presidentit të Kosovës, Hashim Thaçi, në Dhomat e Specializuara në Hagë, avokati i tij, Pierre-Richard Prosper, ka deklaruar se ekipi i mbrojtjes është i entuziazmuar për këtë fazë të re të procesit, e cila, sipas tij, do të shërbejë për të ndriçuar të vërtetën historike mbi ngjarjet e vitit 1999 në Kosovë.
“Presidenti falënderon të gjithë për mbështetjen e këtij procesi. Ne jemi të entuziazmuar për sot. Do të na japë një mundësi që të kthehemi në realitet”, tha Prosper për mediat para seancës.
Ai theksoi se kjo fazë e gjykimit do të jetë një pikë kthese ku do të paraqiten prova që, sipas mbrojtjes, do të vërtetojnë pafajësinë e Hashim Thaçit.
“Do të jetë një mundësi për ta rishikuar të vërtetën se çfarë ka ndodhur realisht në Kosovë në vitin 1999. Kjo do të jetë fillimi i një procesi ku do të shihni daljen e provave që do të tregojnë se Presidenti nuk është përgjegjës për akuzat që i atribuohen”.
Në lidhje me pyetjet rreth dëshmitarëve të mbrojtjes, Prosper theksoi se nuk ka qenë e vështirë t’i bindin të vijnë dhe të dëshmojnë.
“Jo, nuk ishte e vështirë. Mendoj se të gjithë këtu, të gjithë të përfshirët, të gjithë ata që do t’i shihni duke dëshmuar, duan të vijnë dhe të ndajnë të vërtetën. Ka një proces për të marrë autorizimet përkatëse, por ne kemi qenë të suksesshëm dhe shpresojmë të vazhdojmë të jemi të suksesshëm.
Ai shtoi se procesi i sigurimit të autorizimeve të nevojshme ligjore është ndjekur me sukses dhe mbrojtja pret që dëshmitë të kenë ndikim të rëndësishëm në ecurinë e çështjes.
I pyetur për dëshminë e James Cook, Prosper nuk preferoi të japë detaje konkrete, por la të kuptohet se roli i tij është i rëndësishëm.
“Nuk dua të hyj në detaje të dëshmisë. Do ta lë atë të dëshmojë vetë. Por, përsëri, kjo është një mundësi për të dëgjuar të vërtetën për atë që realisht ndodhi dhe cilat ishin rolet dhe përgjegjësitë”, tha ai.
Avokati Prosper u shpreh i bindur se një vendim përfundimtar i drejtë do të jetë rezultat i këtij procesi, nëse gjykata ndjek provat dhe të vërtetën.
Ekipi i Telegrafit, Jehona Hulaj dhe Blend Aligjiku janë duke qëndruar te Dhomat e Specializuara në Hagë për të dhënë informatat e fundit në kohë reale.
