Zëdhënësi i Komisionit Qendror të Zgjedhjeve në Kosovë, Valmir Elezi njoftoi se pas përfundimit të numërimit të votave për kryetarë komunash, po vijon procesi për anëtarët e kuvendeve komunave.
Valmir Elezi beri me dije se në 38 Qendra Komunale të Numërimit KQZ ka angazhuar më shumë se 520 ekipe me mbi 2 mijë anëtarë. Sipas të dhënave paraprake, ai tha se në 54 vendvotimet me kusht janë 2119 zarfe me fletëvotime.
“Numërimi i fletëvotimeve nga votimi me kusht, i fletëvotimeve nga votimi i personave me nevoja të veçanta dhe i fletëvotimve nga votimi jashtë Kosovës, do të bëhet në Qendrën e Numërimit dhe Rezultateve, pasi të përfundojë procesi në Qendra Komunale të Numërimit. Sipas të dhënave paraprake në 54 vendvotime me kusht, në 38 komuna të vendit, kemi 2119 zarfe me fletëvotime”, tha Elezi.
Lidhur me votimin jashtë Kosovës, Elezi bëri me dije se deri tani kanë tërhequr 32 mijë e 258 zarfe me fletëvotime.
“Nga votimi jashtë Kosovës, nga tërheqja e dërgesave postare që është bërë nga 22 kuti postare, nga gjithsej 23, numri i zarfeve të supozuara me fletëvotime është 33 mijë e 258. Së shpejti do të kemi edhe të dhënat nga votimi i personave me nevoja të veçanta, i cili është realizuar jashtë vendvotimeve. Numri i votuesve të regjistruar në këtë program votimi ka qenë 3467”, theksoi ai.
Sipas rezultateve paraprake nga numërimi i votave për anëtarët e kuvendeve komunale në nivel vendi, kryeson Partia Demokratike e Kosovës, e cila pasohet nga Lidhja Demokratike e Kosovës. Lëvizja Vetëvendosje është në vend të tretë dhe pas saj renditet Aleanca për Ardhmërinë e Kosovës.
