Tre neonazistë britanikë, të cilët zotëronin mbi 200 armë dhe planifikonin sulme terroriste ndaj xhamive dhe sinagogave në Angli, u dënuan pas zbulimit të komunikimeve të tyre në grupin e krijuar në internet.
Ata u shpallën fajtorë për përgatitje të akteve terroriste dhe për mbledhje informacioni që mund të përdorej për kryerjen e sulmeve. Njëri prej tyre u dënua gjithashtu për prodhimin e një arme të ndaluar.
Tre burrat, të moshës 35, 26 dhe 25 vjeç, komunikonin në internet dhe kishin krijuar një grup ekstremistësh me ideologji të njëjtë, që donin të “luftonin për kauzën e tyre”. Sipas “The Guardian”, ata nuk ishin takuar asnjëherë personalisht përpara se të dilnin në gjyq së bashku.
Gjatë procesit gjyqësor, i cili zgjati nëntë javë, u zbulua se të tre idealizonin Adolf Hitlerin dhe regjimin nazist, shpreheshin me fyerje raciste, lavdëronin vrasësit serialë dhe nxisnin dhunë ndaj atyre që i konsideronin “armiq”.
25-vjeçari kishte marrë rolin e udhëheqësit të grupit, duke vendosur rregulla të brendshme, përfshirë edhe kërkesën që anëtarët të visheshin me uniforma në stil nazist. Ai e kishte quajtur grupin “Einsatz 14”, një referencë për skuadrat paraushtarake të vdekjes naziste.
Grupi u arrestua pasi shërbimet e sigurisë britanike besuan se një sulm ishte afër, pasi polici sekret kishte infiltruar organizatën dhe kishte raportuar planet e tyre.
Gjatë bastisjeve, policia gjeti një sasi të madhe armësh dhe pajisjesh, përfshirë hanxharë, thika gjuetie, shpata, sëpata, harqe, jelekë antiplumb, një armë tymuese dhe një shkop bejsbolli. U gjet edhe një pjesë e një arme gjysmëautomatike të printuar në 3D, ende jo funksionale.
Hetimet zbuluan se burrat besonin se një “luftë racore” ishte e pashmangshme dhe diskutonin objektiva të mundshëm për sulme, përfshirë xhami, qendra islame trajnimi dhe sinagoga. Ata madje kishin identifikuar një qendër islamike në Leeds si objektiv të mundshëm dhe kishin diskutuar rrëmbimin e një imami, torturimin e tij dhe mënyrat e arratisjes pas aktit.
