Shtetet e Bashkuara të Amerikës kanë bërë të ditur se po bëjnë përpjekje intensive për të parandaluar përshkallëzimin e mëtjeshëm të shpërthimit të fundit të dhunës në Rripin e Gazës, pasi në të kundërt mund të çojë në kolaps të armëpushimit të brishtë mes Izraelit dhe Hamasit.
Sipas raportimeve të Axios, i dërguari i posaçëm i Shtëpisë së Bardhë, Steve Witkoff, dhe bashkëpunëtori i ngushtë i presidentit Donald Trump, Jared Kushner, kanë zhvilluar biseda me zyrtarë izraelitë për të kërkuar një reagim “proporcional por të matur” ndaj sulmit të fundit ndaj forcave izraelite.
Ndërkaq, mëngjesin e sotëm, një grup luftëtarësh të Hamasit sulmoi një patrullë të Forcave të Mbrojtjes të Izraelit (IDF) në zonën jugore të Rripit të Gazës, duke shkaktuar lëndime të lehta te dy ushtarë izraelitë dhe duke dëmtuar një mjet ushtarak.
Ky incident erdhi vetëm pak ditë pas nënshkrimit të armëpushimit të ndërmjetësuar nga SHBA-ja në mes të tetorit, i cili kishte lejuar lirimin e 20 pengjeve izraelitë të gjallë dhe lirimin e rreth 2,000 të burgosurve palestinezë.
Armëpushimi, i cili hapi rrugën për tërheqjen fillestare të trupave izraelite nga pjesë të mëdha të Gazës, tani rrezikohet nga ky shpërthim i papritur i dhunës.
Zëdhënësja e Shtëpisë së Bardhë, Karoline Leavitt, deklaroi në një konferencë për shtyp se “SHBA-ja është e angazhuar plotësisht për të mbështetur paqen e qëndrueshme në rajon dhe po punon pa pushim për të rikthyer qetësinë”.
Ajo theksoi se presidenti Trump ka folur personalisht me kryeministrin izraelit Benjamin Netanyahu për të diskutuar situatën në Gazë, duke theksuar nevojën për “përpjekje të përbashkëta për të shmangur një kthim në konflikt”.
Sipas Axios, Witkoff dhe Kushner kanë komunikuar drejtpërdrejt me ministrin izraelit për Çështjet Strategjike, Ron Dermer, duke i kërkuar Jerusalemit të “reagojë proporcionalisht por të tregojë vetëpërmbajtje”.
Jared Kushner, ish-i dërgurai i Trump-it për Lindjen e Mesme gjatë mandatit të parë presidencial, dhe Witkoff, kanë luajtur një rol kyç në negociatat e fundit.
