Vende evropiane po punojnë me Ukrainën për një propozim të ri 12-pikësh për armëpushim në luftën kundër Rusisë, bazuar në vijat aktuale të betejës, sipas katër diplomatëve evropianë.
Plani, i cili kryesisht inkorporon ide të diskutimeve të mëparshme, synon të mbajë Shtetet e Bashkuara në një rol qendror, duke parashikuar krijimin e një bordi paqeje të udhëhequr nga presidenti amerikan Donald Trump për të mbikëqyrur zbatimin e tij.
Një diplomat evropian i lartë deklaroi se propozimi përfshin një referencë për një “bord paqeje” të kryesuar nga Trump, i modeluar sipas planit 20-pikësh të SHBA-së për Gazën, i cili parashikon gjithashtu një “Këshill Paqeje” nën drejtimin e tij.
“Është një përpjekje e këshilltarëve kombëtarë të sigurisë për të mbajtur Shtetet e Bashkuara të përfshira,” tha diplomati, duke theksuar se ky mekanizëm synon të sigurojë angazhimin e vazhdueshëm të Uashingtonit në procesin paqësor.
Tre diplomatë të tjerë konfirmuan se propozimet po përgatiten, me një prej tyre që specifikoi se bordi do të mbikëqyrë hapat e mëtejshëm pas armëpushimit, duke përfshirë negociatat për territorin pa njohur ndonjëherë territoret e okupuara nga Rusia si ruse.
Sipas planit, pas armëpushimit të pranuar nga të dyja palët, do të nisin negociatat për territorin, por pa njohje të aneksimit rus, duke parashikuar kthimin e të gjithë fëmijëve të dëbuar në Ukrainë dhe shkëmbimin e të burgosurve.
Plani ofron gjithashtu garanci sigurie për Ukrainën, fonde për riparimin e dëmeve të luftës dhe një rrugë të shpejtë drejt anëtarësimit në Bashkimin Evropian.
Liderët evropianë bënë thirrje sot ndaj Uashingtonit për të qëndruar të vendosur në kërkesën për një armëpushim të menjëhershëm në Ukrainë, me vijat aktuale të frontit si bazë për çdo bisedim të ardhshëm.
“Rusia po zvarrit taktikisht procesin, duke refuzuar armëpushimin e menjëhershëm dhe të pakushtëzuar, ndërsa Ukraina është pala e vetme e interesuar për paqen”, thanë liderët evropianë në një deklaratë të përbashkët, duke akuzuar Moskën për zgjedhjen e vazhdueshme të dhunës dhe shkatërrimit.
Ata theksuan se Ukraina duhet të jetë në pozicionin më të fortë të mundshëm para, gjatë dhe pas armëpushimit.
Ky propozim vjen në një moment tensioni diplomatik, pas anulimit të samitit të planifikuar mes Trump-it dhe presidentit rus Vladimir Putin, i cili u shtyu për shkak të refuzimit të Moskës për armëpushim të menjëhershëm.
