Princi Andrew, vëllai i Mbretit, ka rënë dakord të largohet nga Royal Lodge nëse ai dhe ish-gruaja e tij, Sarah Ferguson, do të kenë mundësinë të jetojnë në shtëpi të tjera brenda pasurisë së Windsor.
Sipas raportimeve, Andrew, 65 vjeç, ka kërkuar të jetojë në Frogmore Cottage, ish-shtëpia e Dukës dhe Dukeshës së Sussex, ndërsa Sarah Ferguson, 66 vjeç, ka shprehur dëshirën të transferohet në Adelaide Cottage, e cila ndodhet afër.
Burimet e përfshira në negociata kanë treguar se Princi Andrew është në bisedime të avancuara me Pallatin Buckingham për të liruar Royal Lodge, një rezidencë e listuar me 30 dhoma në Windsor Great Park.
Ky zhvillim ka ardhur pas zbulimit se ai paguan një qira jashtëzakonisht të ulët për këtë pronë. Megjithëse Andrew beson se ka një kontratë qiraje të pandryshuar për të qëndruar në Royal Lodge, ai mund të pranojë largimin nëse merr një kompensim financiar dhe një shtëpi të përshtatshme si zëvendësim.
Një burim i njohur ka thënë për “The Sun” se Andrew ka kërkuar që të zhvendoset në Frogmore Cottage, ndërsa Sarah ka kërkuar të transferohet në Adelaide Cottage.
Megjithatë, ende nuk është e qartë se si do të miratohet ky propozim nga Pallati Buckingham.
Frogmore Cottage, një shtëpi me pesë dhoma gjumi, iu dhurua Harry-t dhe Meghan-it nga Mbretëresha e ndjerë në vitin 2018 si dhuratë martese, dhe ka kaluar një rinovim të kushtueshëm prej 2.4 milionë paundësh. Pas zhvendosjes së çiftit Sussex në SHBA, prona është ofruar për Princi Andrew.
Ndërkohë, Adelaide Cottage, që ka katër dhoma gjumi, është aktualisht në pronësi të Princit dhe Princeshës së Uellsit, të cilët do të zhvendosen në Forest Lodge këtë vit.
Një burim ka theksuar se Andrew dhe Sarah, edhe pse të divorcuar që në vitin 1996, kanë vazhduar të jetojnë së bashku dhe nuk janë të gatshëm të ndahen.
Kërkesa e Andrew për dy prona është parë si një pasojë e presionit të madh që ata kanë përjetuar këtë vit, duke e konsideruar këtë si një mundësi për një fillim të ri për të dy.
Për më tepër, presioni ndaj Andrew është shtuar që pas publikimit të një kopje të kontratës së qirasë për Royal Lodge nga “The Times” javën e kaluar.
Kjo kontratë zbulon se Andrew ka të drejtë të jetojë në këtë pronë për një periudhë prej 75 vjetësh dhe ka paguar një qira simbolike prej 8.5 milionë paundësh për të.
Sipas dokumenteve, ai gjithashtu gëzon të njëjtën mbrojtje ligjore si çdo qiramarrës tjetër dhe nuk mund të largohet pa pëlqimin e tij, përveç nëse prona është lënë të shkatërrohet.
