Siria e ka njohur zyrtarisht si shtet të pavarur Republikën e Kosovës. Lajmin e ka komunikuar Presidentja e Kosovës, Vjosa Osmani përmes një postimi në Facebook, ku ndër të tjera bën me dije se ka zhvilluar një takim me Presidentin Al Sharaa, në Riad.
“Siria njeh Kosovën! Me mbështetjen e Lartësisë së tij Mbretërore, Princit të Kurorës së Arabisë Saudite, Muhammed bin Salman Al Saud, sot ne Riad arritëm marrëveshjen nëpërmjet së cilës Republika Arabe e Sirisë njeh Republikën e Kosovës. Falënderoj Presidentin Al Sharaa për vendimin për njohje të Kosovës si dhe për mbështetjen e tij për popullin tonë”, shkruan Osmani.
E para e shtetit po ashtu sqaron se kjo njohje u arrit edhe përmes ndihmës nga Princi i Kurorës së Mbretërisë së Arabisë Saudite, i cili e ka bërë të mundshëm këtë akt historik ndërmjet dy shteteve.
“Populli i Kosovës dhe ai i Sirisë kanë vuajtur e sakrifikuar shumë për ta arritur lirinë. Prandaj kjo njohje e ndërsjellë sot nuk është vetëm e sovranitetit shtetëror, por edhe njohje e sakrificës së shumë brezave për të jetuar të lirë. Tani Kosova njihet nga 120 shtete. Republika jonë po ecë përpara dhe nuk ka asgjë që mund ta ndalë!”, shprehet Osmani.
