“The Look” titullohet libri më i i ri i Michelle Obama, i sapo publikuar. BBC hulumton veshjet e zonjave të para përgjatë dekadave, çfarë ka dashur secila prej tyre të përçojë për veten, rolin dhe epokën?
Në një intervistë për Good Morning America, Obama tha se veshjet nuk ishin të rastësishme. “Unë mendoja vërtet për atë që doja të thoja me veshjen. Doja të flisja për përfshirjen, diversitetin, hapjen e mundësive dhe moda ishte një nga mjetet që më lejonte ta bëja.”
Ajo duhet të ishte në dijeni që stili i saj do të shqyrtohej mirë sepse veshja e zonjës së parë ka qenë gjithnjë temë diskutimi qëkur ky rol mbahej nga Martha Washington, gruaja e presidentit George.
Veshja e zonjës së parë shpesh ka qenë politike, burim për diplomacinë e jashtme ose tregues besnikërie.
“Ishte një detyrë e ndërlikuar. Roli i zonjës së parë është një lloj pune, pa punë. Ti e di që duhet të jesh frymëzuese, por e arritshme. Ti duhet të jesh vetja, autentike, por njëkohësisht përfaqësuese.”
Pra çfarë kanë veshur zonjat e para në Shtëpinë e Bardhë dhe si veshjet e tyre kanë pasqyruar jo vetëm ato, por edhe epokën e tyre?
Martha Washington
Historiania Feather Foster thotë se ajo nuk kishte asnjë paraardhëse për veshjen veç mësimeve të monarkisë. Por çifti Washington nuk donte të perceptohej si monark dhe ajo vishte vetëm veshje të prodhuara në SHBA nga copat amerikane para Luftës Revolucionare (1776) dhe kjo nuk ndrysoi kurrë. Ishte 57 vjeçe kur e mori këtë rol dhe ishte dinjitoze e me sjelljet e duhura. Fustanet e saj ishin të errëta ose të zbehta. Mbizotëronin ngjyra e zezë, gri dhe e kaltra e zbehtë në verë, por cilësia e copave ishte gjithnjë e lartë. Bizhuteritë të thjeshta dhe jo që binin në sy. “Stili i saj ishte shumë mëmësor”, duke iu përshtatur imazhit të “nënës së kombit.”
Dolley Madison
Gruaja e presidentit të katërt të SHBA-ve, James, mund të ketë qenë ndoshta e para që përcaktoi modën dhe stilin për rreth 40 vite. Ajo përdorte turbanët dhe fustanet me dekolte. I pëlqente të organizonte festa dhe krijoi trende “sesi hante, çfarë servirte, ku shkonte, si i mobilonte dhomat… madhe edhe sesi përshëndetej me të ftuarit!” Stili dhe karizma e saj ishin të rëndësishme për administratën e të shoqit. Ai ishte i vogël dhe pa shije. Ajo ishte e shoqërueshme e me takt. Ndryshe nga Martha, Dolley i pëlqenin veshjet e luksit që i kushtonin të shoqit me taksa e tarifa.
Mary Geneva ‘Mamie’ Eisenhower
Ajo ishte shumë popullore, përfaqësonte thjeshtësinë, dukej si çdo grua amerikane, vishej si e tillë dhe njerëzit e kishin të lehtë të lidheshin me të. I pëlqente silueta e Dior me belin e nxjerrë në pah dhe fundet e fryra. Kishte një dashuri për ngjyrën rozë dhe sidomos nuancën “Mamie” që ishte simbolike për rolet gjinore në vitet 1950. Edhe dashuria e saj për kapelet e vogla me kashtë nga Ekuatori ndihmoi ekonominë atje sepse kishte një kërkesë shumë të madhe.
Jackie Kennedy
Ndoshta zonja e parë më e famshme që vendosi standardin për pasueset dhe krijoi një stil ikonik që ndiqet edhe sot. Jacie ishte e re, por stili i saj u bë klasik. Ajo e dashuronte modën europiane dhe e kuptonte modën thellësisht. Ishte ndoshta e para që e përdori modën edhe si diplomaci. Disa ishin kundër shijes së saj për stilin europian, madje ajo kishte veshje të stiluara nga Chanel, por të kopjuara dhe të riprodhuara për të në Neë York që t’u tregonte pak besnikëri SHBA-ve.
Nancy Reagan
E patëmetë dhe me veshje luksoze, Nancy Reagan vishte Chanel, Yves Saint Laurent dhe Valentino, por edhe Oscar de la Renta, Bill Blass dhe Carolina Herrera. Ajo ishte standardi i konservatorizmit dhe si ish-aktore, e njihte mirë median dhe kamerat. Ajo që ndoshta do ta bënte edhe më shumë të njohur ishte ngjyra e kuqe e njohur si “E kuqja Reagan” ose “E kuqja Nancy”.
Hillary Clinton
Clinton ishte e para që i ktheu pantallonat në pjesë të imazhit të saj dhe e para që e realizoi portretin me kostum. Ajo e ka adhuruar gjithnjë rrethin e flokëve dhe i dha zë një brezi grash në politikë që ishin bashkëshorte, por edhe punonin. Gjatë periudhës së saj të qëndrimit në Shtëpinë e Bardhë, ajo ishte në qendër të kritikave seksiste dhe nisi ta kuptonte rolin dhe rëndësinë e modës kur u kthye vetë në aktore politike.
Michelle Obama
Ajo vishej me Target apo J Crew dhe mbështeste stilistët e rinj duke e përdorur modën si mjet mbështetjeje për politikat e të shoqit. Flokët e saj ishin shpesh një temë diskutimi dhe nuk u shmangej dot kritikave. Së fundmi është parë me flokët gërsheta, por asokohe nuk e dinte nëse njerëzit do ta pëlqenin dhe nuk donte që të ktheheshin “në shpërqendrim.” Edhe krahët e saj të zhveshur shpesh kritikoheshin, por Obama e dinte mirë se nuk duhej të binin në sy vetëm veshjet. E famshme, por jo një yll dhe “veshjet s’mund të shpreheshin asnjëherë më fort se ajo që kisha unë për të thënë”, thotë ajo.
Melania Trump
Veshje të qepura për merak, pardesy me rrip, gjithnjë e kuruar. Për disa, është emblema e stilit të zonjës së parë, për të tjerë ka shije ekstravagante dhe që shpesh mesazhi është interpretuar ndryshe. Ndryshe nga paraardhëset, Melania nuk flet shumë ndaj veshjet e saj janë edhe më të rëndësishme sepse shpesh, janë “e folura e saj.” Si ish-modele, “ajo di mirë si t’i përdorë veshjet.”
