Autoritetet britanike kanë arrestuar një 39-vjeçar që konsiderohet si një nga drejtuesit kryesorë të një grupi terrorist të lidhur me Hamasin, i cili dyshohet se po planifikonte sulme ndaj institucioneve izraelite dhe hebraike në Gjermani.
Tre persona të tjerë, të cilët besohet se janë pjesë e së njëjtës rrjet, u arrestuan në Gjermani në shtator dhe akuzohen për furnizim me armë zjarri dhe municione. Sipas rrjetit televiziv britanik ITV, i arrestuari – që përballet me mundësinë e ekstradimit në Gjermani – është “djali i një zyrtari të lartë të Hamasit”.
Aktivisti britanik Aman Bhogal nga lëvizja “Global Britain” deklaroi se “për shumë kohë, ekstremistët dhe terroristët nga e gjithë bota janë pritur në Britani me ‘tapet të kuq’”. Ai kritikoi elitën liberale britanike, duke thënë se “kanë shpërndarë pasaporta si karamele dhe pastaj kur këta individë përfshihen në terrorizëm, mediat kryesore i quajnë ‘britanikë’.”Autori dhe analisti Sean Durns shtoi: “Kur fton në vendin tënd njerëz që simpatizojnë terrorizmin, nuk duhet të habitesh kur përballesh me terrorizëm.”
Sipas hetimeve, i dyshuari ishte vënë nën vëzhgim nga policia gjermane kundër terrorizmit që në qershor të këtij viti, pasi dyshohej se mbikëqyrte transportin e armëve të zjarrit drejt Gjermanisë. Ai u arrestua të hënën nga policia britanike, pas një kërkese për ekstradim të paraqitur nga prokuroria gjermane.
Ky arrestim shihet si një tjetër kujtesë për rrezikun e vazhdueshëm të ekstremizmit islamik në Evropë – një kërcënim që, sipas analistëve, shpesh neglizhohet nga udhëheqësit politikë.
Ekspertët paralajmërojnë gjithashtu për mundësinë e një zgjerimi global të Hamasit. Sipas studiuesit amerikan dhe njohësit të çështjeve të Hamasit, Matthew Levitt, organizata ka tentuar disa herë të kryejë sulme jashtë Lindjes së Mesme, por ato janë parandaluar ose dështuar para ekzekutimit.
Me strukturat operative të Hamasit në Gaza të goditura rëndë, zyrtarët izraelitë dhe evropianë shprehin frikë se grupi po kërkon të zgjerojë aktivitetin e tij global dhe të ndërmarrë aksione jashtë rajonit – një ndryshim i madh nga mënyra tradicionale e veprimit të tij.
