Në projektbuxhetin për vitin 2026, një vëmendje e madhe i është kushtuar investimeve publike, të cilat janë planifikuar në masën 6.5% e PBB-së, duke përfshirë 6.8 miliardë lekë financime të pritshme nga Plani i Rritjes me BE-në.
Fondi total i parashikuar për realizimin e investimeve publike gjatë vitit të ardhshëm është 179.6 miliardë lekë, ose rreth 1.8 miliardë euro.
Fokus në infrastrukturë dhe energji
Shpenzimet për Infrastrukturën dhe Energjinë pritet të zënë 2.8% të PBB-së, duke synuar modernizimin e rrjetit rrugor dhe hekurudhor, si dhe zgjerimin e aksesit në ujë dhe kanalizime.
Projekti madhor rrugor
Një ndër investimet me përparësi absolute është zgjerimi i autostradës Tiranë–Durrës, një prej segmenteve më të rëndësishëm për lëvizjen e automjeteve në Shqipëri. Fondet do të parashikohen për ndërhyrje në të dyja fazat e këtij projekti.
Punimet do të vijojnë edhe në segmente të tjerë kyç:
• Rikostruksioni i rrugës së vjetër Kominat-Ndroq-Plepa.
• Zgjerimi i rrugës Elbasan – Qafë Thanë dhe segmenti Elbasan – Lekaj.
• Rruga Berat-Ballaban.
Paralelisht, buxheti angazhohet për mirëmbajtjen e rreth 3,522 km rrugë në të gjithë vendin në harkun kohor 2026 – 2028.
Rindërtimi i hekurudhave
Vëmendje e veçantë i kushtohet edhe linjave hekurudhore me financim të konsiderueshëm për:
• Rehabilitimin e linjës hekurudhore Durrës – Terminali pasagjerëve – Tiranë.
• Ndërtimin e linjës hekurudhore Tiranë – Rinas (Aeroporti).
• Rehabilitimin e linjës hekurudhore Vorë – Hani i Hotit.
• Rehabilitimin e linjës Durrës – Rrogozhinë.
Sipas draftit, planifikimi i investimeve për vitin 2026 ka mbajtur parasysh të gjitha detyrimet kontraktuale, me përparësi financimin e projekteve në vazhdim.
