Zgjedhjet e pjesshme vendore në Bashkinë e Tepelenës kanë përfunduar me një fitore të thellë për kandidatin e Partisë Socialiste, Gramoz Sako, i cili ka siguruar 77.85% të votave, përballë kandidatit të pavarur të mbështetur nga Partia Demokratike, Gabriel Guma, që ka marrë 22.15%.
Pas shpalljes së rezultatit, Sako u shpreh se fushata, ndonëse e shkurtër, ishte moderne dhe e përqendruar te qytetari.
“Edhe pse ishte një fushatë e shkurtër, ishte një fushatë moderne. Pavarësisht kushteve atmosferike, qytetarët e Tepelenës dolën dhe votuan duke shprehur vullnetin e tyre,” tha ai.
Ai theksoi angazhimin për të vijuar punët e nisura dhe për të çuar përpara projektet e zhvillimit.
“Nga sot është detyrimi im, në radhë të parë, që t’u shërbej qytetarëve për të vijuar punët e nisura dhe për të vazhduar projektet në të ardhmen. Mirënjohës pafund për çdo qytetar të Tepelenës, mirënjohës për Partinë Socialiste,” deklaroi Sako.
Guma pranon rezultatin: Nuk është humbje personale, por një reflektim për ringjalljen sociale
Nga ana e tij, Gabriel Guma pranoi rezultatin dhe e cilësoi procesin si një moment reflektimi për opozitën.
“Pritshmëritë e mia ishin shumë të mira, por duhet të qëndrojmë me këmbë në tokë. Kemi pjesëmarrjen e njerëzve pa imponim për të ardhur për të votuar,” tha ai.
Guma theksoi se nuk e sheh rezultatin si humbje personale.
“Unë nuk e konsideroj humbje personale, por një humbje për një ringjallje sociale. Jo humbja ime, sepse unë jam i ri. Për mua politika sapo ka nisur dhe nga gabimet mësohet – sepse edhe unë kam bërë plot gabime gjatë kësaj fushate,” u shpreh ai.
Krahas Tepelenës, këtë të diel u votua edhe në Vlorë, Cërrik, Berat dhe Mat, ku qytetarët zgjodhën kryebashkiakët e rinj.
Në garë ishin 13 kandidatë nga Partia Socialiste dhe opozita.
Procesi i numërimit ka përfunduar në Vlorë dhe Cërrik dhe Tepelenë, ndërsa vijon në Berat dhe Mat. Deri më tani, kandidatët e PS-së kryesojnë në të gjitha bashkitë.
Një risi në këto zgjedhje ishte aplikimi për herë të parë i numërimit me Inteligjencë Artificiale në Bashkinë e Tepelenës, si pjesë e një projekti pilot për modernizimin e procesit zgjedhor.
