Zëvendësministrja e Ekonomisë dhe Inovacionit, Olta Manjani, mori pjesë në Samitin e Dytë Botëror për Zhvillim Social, organizuar në Doha (Katar), me ftesë të Organizatës së Kombeve të Bashkuara.
Samiti u zhvillua 30 vite pas miratimit të Deklaratës së Kopenhagës për Zhvillimin Social dhe mblodhi përfaqësues të lartë nga vende të ndryshme të botës për të diskutuar politikat që nxisin zhvillimin gjithëpërfshirës dhe reduktimin e pabarazive.
Gjatë fjalës së saj, zv.ministrja Manjani prezantoi modelin e zhvillimit gjithëpërfshirës të Shqipërisë, që ndërthur rritjen ekonomike me përfshirjen sociale, shkruan A2 CNN.
Ajo theksoi se rritja progresive e pagës minimale ka ndikuar ndjeshëm në reduktimin e varfërisë, ndërsa programet e targetuara si “Garancia Rinore” dhe masat aktive të tregut të punës po mbështesin integrimin e të rinjve, grave dhe grupeve të cenueshme në tregun e punës.
Sipas saj, përmes reformave në administratën publike, procesit të digjitalizimit dhe integrimit europian, Shqipëria po forcon transparencën, konkurrueshmërinë dhe qëndrueshmërinë institucionale.
“Rritja e qëndrueshme ekonomike qëndron te fuqizimi i kapitalit njerëzor dhe modernizimi i institucioneve”, u shpreh Manjani, duke nënvizuar angazhimin e qeverisë shqiptare për zhvillim të barabartë dhe gjithëpërfshirës.
