Meghan Markle është kthyer në set pas plot tetë vitesh larg aktrimit dhe duket se e ka pritur këtë moment me shumë emocione dhe pak autoironi.
Dukesha e Sussex-it ka nisur xhirimet për filmin e ri të Amazon MGM Studios, “Close Personal Friends”, ku ajo shfaqet duke interpretuar veten. Një burim për revistën People tregon se Meghan nuk e ka fshehur faktin që ka kohë pa aktruar.
“Bënte shaka duke thënë se ndihej pak e ‘ndryshkur’,” – rrëfen burimi. “Por ishte e qartë që ishte përgatitur shumë dhe se për të ishte një moment i madh të rikthehej. Dhe ka qenë fantastike.”
Sipas të njëjtit burim, Meghan ka mbërritur në set me shumë qetësi, është prezantuar thjesht me “Meghan” dhe ka krijuar menjëherë atmosferë pozitive:
“Çdo gjë tek ajo ishte shumë e ëmbël dhe e qetë. Dukej sinqerisht e lumtur që ishte në set. Ishte shumë e këndshme të rrije pranë saj, kishte një energji shumë të ngrohtë.”
Në fotot nga xhirimet në Pasadena, Kaliforni, ajo shihej në humor të mirë, duke buzëqeshur teksa hipte në makinë për të xhiruar një skenë pranë pishinës. Për rolin e saj, Meghan ishte veshur thjesht dhe elegant: një këmishë me nuanca blu dhe të bardha, të kombinuara me pantallona të bardha.
Filmi fokusohet te një çift që bëhet mik me një çift të famshëm dhe pikërisht këtu hyn Meghan, në një lojë interesante mes realitetit dhe fiksonit. Mes emrave që do të jenë në kast, përmenden Jack Quaid, Lily Collins dhe Brie Larson.
Rikthimi i saj në aktrim vjen tetë vite pasi Meghan i dha fund karrierës në Hollywood, pas fejesës me Princin Harry në vitin 2017. Roli i saj i fundit ishte ai i Rachel Zane në serialin “Suits”, ku ajo luajti për shtatë sezone, nga viti 2011 deri në 2018. Më herët, ajo ishte shfaqur edhe në filma si “Remember Me” (2010) dhe “Horrible Bosses” (2011).
Pas një kapitulli të gjatë të fokusuar te familja, aktivizmi dhe projektet mediatike, duket se Meghan Markle është gati t’i rikthehet dashurisë së vjetër: aktrimit – edhe nëse, siç thotë me humor vetë, “është pak e ndryshkur”.
