Sektori i peshkimit dhe akuakulturës do të ketë një vit të ri zhvillimi dhe modernizimi. Për vitin 2026 qeveria ka parashikuar 10% më shumë fonde për këtë sektor, duke vendosur një kurs të qartë drejt peshkimit të qëndrueshëm, me përdorim të përgjegjshëm të burimeve dhe standarde europiane.
Ministri i Bujqësisë dhe Zhvillimit Rural, Andis Salla theksoi sot se buxheti i ri për sektorin e peshkimit dhe të akuakulturës arrin në 580 milionë lekë dhe do të ndihmojë në rritjen e prodhimit me 10-20% dhe në shtimin e eksporteve me 60-70% deri në vitin 2027, duke e bërë peshkimin një nga motorët e rinj të ekonomisë blu shqiptare.
Salla tha se “projektbuxheti për vitin 2026 mbështet katër shtylla kryesore në sektorin e peshkimit: Tregje moderne peshkimi, që garantojnë produkte më cilësore, të sigurta dhe të gjurmuara; Rritje e prodhimit biologjik, me rreth 2 milionë rasate peshku në vit për ripopullimin e liqeneve dhe ruajtjen e biodiversitetit; Zhvillimi i zonës së Butrintit, ku do të nisë thellimi i Kanalit të Vivarit, për të përmirësuar kushtet e rritjes së midhjes dhe për të shtuar prodhimin vendas dhe infrastrukturë portuale më moderne, me më shumë hapësira ankorimi dhe shërbime bazë për flotën e peshkimit”.
Një tjetër risi, vuri në dukje ai, është skema mbështetëse prej 400 milionë lekësh, e cila do të përdoret për modernizimin e flotës, zëvendësimin e motorëve, riparime, investime në akuakulturë dhe uljen e impaktit mjedisor.
Sipas ministrit Salla, këto investime janë të ndërtuara në përputhje me Politikën e Përbashkët të Peshkimit të Bashkimit Europian, duke forcuar kapacitetet kombëtare për përmbushjen e Kapitullit 13 të negociatave për anëtarësim në BE.
“Peshkimi shqiptar po hyn në një fazë të re zhvillimi. Synojmë më shumë prodhim, më shumë cilësi dhe më shumë eksporte drejt tregut europian”, u shpreh Salla, në Komisionin për Bujqësinë, Ushqimin dhe Zhvillimin Rural, gjatë diskutimit të pr.buxhetit 2026 për bujqësinë.
