Italia mori një humbje të dhimbshme në ndeshjen e fundit të fushatës kualifikuese të Botërorit 2026, 1-4 nga Norvegjia.
Tani fati i “Azzurrëve” për në Botëror do të vendoset nga play off-i për të tretën herë radhazi, ku në dy herët e fundit Italia dështoi të kualifikohej për në Kupën e Botës.
Këto dy zhgënjime duket se kanë zhdukur edhe shpresën te tifozët italianë, të cilët nuk besojnë më te kombëtarja e tyre.
Sipas një sondazhi të bërë nga Sport Mediaset, deri më tani 74% e votuesve mendojnë se Italia nuk do të kualifikohet për të tretën herë radhazi në Botëror.
Italia do ta mësojë kundërshtarin e saj të enjten, më 20 nëntor, me kundërshtarët e mundshëm të “Azzurrëve” që janë Suedia, Irlanda e Veriut, Rumania dhe një mes Maqedonisë së Veriut dhe Uellsit.
Kujtojmë që në dy herët e fundit ishin pikërisht Suedia dhe Maqedonia e Veriut ato që ndaluan Italinë të merrte pjesë në fazën finale të Botërorit.
