FinCEN, agjencia financiare e Departamentit të Thesarit të SHBA-së, ka zbuluar se mes viteve 2017 dhe 2024, rrjeti i kazinove të familjes Hysa, përfshirë Midas dhe Mirage në Meksikë , ka lehtësuar pastrimin e mbi 2 milionë dollarëve për Kartelin famëkeq të Sinaloas.
Sipas dokumenteve amerikane, dhjetë kazino të lidhura me familjen Hysa kryenin depozita të fragmentuara në llogari të ndryshme bankare, me qëllim shmangien e kontrolleve kundër pastrimit të parave, shkruan RIO DOCE.
FinCEN e përshkruan këtë skemë si një operacion të sofistikuar ndërkombëtar, ku drejtuesit e kazinove merrnin udhëzime specifike nga strukturat e Sinaloas.
Në disa raste, karteli u ka dhënë mbi 30 llogari bankare për depozitat, të cilat më pas hynin në sistemin financiar meksikan dhe përfundonin në rrjetin bankar amerikan, duke rrezikuar integritetin e tij.
Këto gjetje çuan në sanksione të menjëhershme ndaj kompanive të lidhura me familjen Hysa, si dhe bllokime llogarish, kallëzime penale dhe pezullim aktivitetesh në disa shtete të Meksikës. Në total, 31 persona dhe 24 kompani u identifikuan si pjesë e rrjetit të pastrimit të parave që vepronte midis Meksikës, SHBA-ve, Kanadasë, Panamasë, Evropës dhe Shqipërisë.
Në raportimet mediatike është theksuar se Luftar Hysa, i cilësuar nga SHBA si pjesë e strukturave të pastrimit të parave të Kartelit Sinaloa, ka qenë i pranishëm në një takim me kryeministrin Edi Rama.
ARTIKULLI I PLOTË
Mes viteve 2017 dhe 2024, dhjetë kazino – përfshirë Mirage në Kuliakán – dhe tre degë të kazino Midas në Mazatlán, Los Mochis dhe Guasave, të operuara nga familja Hysa, lehtësuan pastrimin e më shumë se 2 milionë dollarëve për Kartelin e Sinaloas, sipas FinCEN të Departamentit të Thesarit të SHBA-së.
Këto biznese, duke përfshirë Midas në Agua Prieta, Sonora dhe Rosarito, Baja California; Palermo në Nogales dhe Skampa në Ensenada, Baja California dhe Villahermosa, Tabasko, sipas SHBA-së kontrollohen dhe mbikëqyren nga drejtuesit e lartë të Midas Casino në Mazatlán. Nga 2021 deri në 2023, ata kryenin pagesa mujore për Kartelin e Sinaloas përmes depozitave në para të gatshme në llogari të ndryshme bankare në Meksikë.
“Prej vitesh, bizneset e lojërave të fatit, përfshirë drejtuesit e tyre, u kanë dërguar pagesa anëtarëve të lartë të kartelit për të shmangur zbulimin. FinCEN vlerëson se drejtuesit e këtyre bizneseve kanë marrë udhëzime të detajuara nga Karteli i Sinaloas për mënyrën e shmangies së kontrolleve kundër pastrimit të parave,” deklaroi agjencia.
Drejtuesve të kazinove u kërkohej të kryenin një ose dy transaksione drejt llogarive të bankave të zgjedhura nga një anëtar shumë me ndikim i Kartelit të Sinaloas, dhe të lejonin që paratë të merreshin fizikisht në Midas në Mazatlán.
Për të shmangur zbulimin, karteli kërkonte që të bëheshin dy depozita për çdo llogari, jo më shumë se 90,000 peso secila (4,354 dollarë), në ditë jo të njëpasnjëshme, për të mos aktivizuar sinjalet e bankave.
FinCEN e quan këtë një operacion të sofistikuar, të krijuar për të shmangur çdo lidhje të dokumentueshme mes bizneseve të lojërave të fatit dhe Kartelit të Sinaloas.
Në një rast, një anëtar me ndikim i kartelit dha mbi 30 llogari bankare të kompanive në Meksikë që të përdoreshin për depozitat në para të gatshme.
Sipas FinCEN-it, këto pagesa hynë në sistemin financiar meksikan me dokumentacion minimal ose pa dokumentacion, gjë që përbën rrezik për integritetin e sistemit financiar amerikan, i cili është shumë i lidhur me bankat meksikane.
Sanksionet dhe pasojat
“Vëllimi, kohëzgjatja dhe natyra e përsëritur e kësaj veprimtarie tregojnë se këto biznese janë burim i rëndësishëm dhe i qëndrueshëm i fondeve dhe lehtësues të pastrimit të parave për Kartelin e Sinaloas”.
Vetëm në vitin 2024, tregtia SHBA–Meksikë arriti 935 miliardë dollarë, dhe një pjesë e parave të pastruara nga kazinotë përfundoi në banka meksikane me lidhje direkte me bankat amerikane.
Karteli i Sinaloas mbetet një nga organizatat më të mëdha të trafikut të drogës në botë, që transporton sasi të mëdha fentanili dhe heroine drejt SHBA-ve.
Dokumenti i datës 13 nëntor ndalon bankat amerikane të mbajnë llogari korrespondente me banka të huaja të lidhura me kazinotë e sanksionuara.
Sanksioni u publikua një ditë pasi Omar García Harfuch deklaroi se 13 kazino fizike dhe virtuale në disa shtete të Meksikës kishin bërë transaksione të pajustifikuara në para të gatshme dhe transferta ndërkombëtare.
Pati bllokime llogarish, pezullime aktivitetesh, kallëzime penale dhe bllokim të faqeve elektronike.
Qeveria nuk publikoi emrat e kazinove, por biznesmeni Ricardo Salinas Pliego konfirmoi se dy prej kazinove virtuale ishin të kompanive të tij.
Ministria e Financave deklaroi se, në bashkëpunim me OFAC dhe FinCEN, u pezulluan aktivitetet e kompanive të lidhura me një grup të krimit të organizuar me lidhje me Kartelin e Sinaloas, si dhe entitete të huaja që operonin rrjete pastrimi parash në Meksikë, SHBA dhe Evropë.
OFAC shpalli si Grup të Krimit të Organizuar Hysa anëtarët Luftar, Arben, Ramiz, Fatos dhe Fabjon Hysa, si dhe Eselda Baku dhe meksikanin Gilberto López López, së bashku me 19 kompani. UIF identifikoi edhe pesë të tjera, duke çuar në 31 persona të bllokuar.
Analiza tregoi se 24 kompani dhe 7 individë operonin struktura dhe rrjete ndërkombëtare financiare për të transferuar dhe fshehur fonde të paligjshme, përmes lëvizjeve shumë milionëshe dhe triangulimit të flukseve mbi 1 miliard peso midis Meksikës, SHBA-ve, Kanadasë, Belize-s, Panamasë, Rumanisë, Polonisë dhe Shqipërisë.
UIF paraqiti kallëzime për pastrim parash dhe përdorim të kompanive fantazmë për të justifikuar të ardhura të rreme.
Midas-i i Mazatlán dhe familja Hysa
Sipas SHBA-ve, kazinoja Midas në lagjen Alameda në Mazatlán, si dhe nëntë kazinotë e tjera të sanksionuara, operohen nga familja Hysa, kryesisht përmes kompanisë Entretenimiento Palermo SA de CV, themeluar më 13 shkurt 2006 në Sonora dhe zhvendosur në Mazatlán në 2024.
Partnerët themelues ishin Miguel Ángel Valdez Estrada dhe Arben Hysa. Më pas u bashkuan Luftar Hysa dhe Marcelo Falce García, dhe në 2021 Gilberto López López u bë komisioner.
Gilberto López López, nga Culiacán, është aksioner edhe në El Arte de Cocinas y Beber SA de CV dhe Cucina del Porto SA de CV, të dyja të themeluara në 2023, si dhe Operadora Alejil SA de CV, themeluar në 2014 në Nuevo León.
Tre nga kompanitë e përfshira janë pjesë e grupit prej 19 të sanksionuar nga SHBA, të cilat thuhet se operohen nga familja Hysa, anëtarët e së cilës jetojnë në Meksikë, Kanada dhe Shqipëri.
Nuk është hera e parë që familja Hysa akuzohet për lidhje me krimin e organizuar. El Universal raportoi në 2022 se një hetim kundër tyre për pastrim parash përmes kazinove dhe restoranteve ishte hapur që dy vite më herët.
Pas shpalljes së sanksioneve, kazinotë Midas në Guamúchil, Mazatlán dhe Los Mochis u pezulluan. Ndërkohë, Mirage në Culiacán ka qenë jashtë funksionit të paktën për tre vite. / Nga Roxana Vivanco
