residenti francez Emmanuel Macron deklaroi sot se Evropa dhe Ukraina tani disponojnë argumente dhe mjete të shumta për të ushtruar presion ndaj Rusisë në negociatat për të siguruar paqen në Ukrainë.
Ai theksoi se mbetet vetëm të pajtohen pozicionet e Ukrainës, Evropës dhe Shteteve të Bashkuara.
“Të gjithë ne mbështesim Ukrainën, të gjithë mbështesim paqen dhe bisedimet për paqe për të arritur një paqe të qëndrueshme dhe të besueshme”, tha Macron para fillimit të negociatave në Londër me kryeministrin e Britanisë së Madhe Keir Starmer, kancelarin gjerman Friedrich Merz dhe presidentin ukrainas Volodymyr Zelensky.
Macron vuri në dukje se Bashkimi Evropian po ofron fonde për Ukrainën, po organizon furnizimin me pajisje dhe programe trajnimi.
“Është një fakt se Ukraina po i bën ballë këtij lufte, dhe është një fakt se ekonomia ruse po fillon të vuajë, veçanërisht pas sanksioneve tona më të fundit dhe atyre të imponuara nga Shtetet e Bashkuara.
Çështja kryesore tani është të pajtojmë pozicionet tona të përbashkëta, ato të Evropës, Ukrainës dhe SHBA-së, me qëllim për të përmbyllur këto bisedime paqeje dhe për të filluar një fazë të re në kushtet më të mira të mundshme për Ukrainën, për Evropën dhe për sigurinë tonë kolektive”, u shpreh presidenti francez.
Starmer e mirëpriti Zelenskyn, Merzin dhe Macronin jashtë rezidencës së kryeministrit britanik në “Downing Street” në Londër.
Në mbrëmje, Zelensky pritet të fluturojë drejt Brukselit për të takuar Sekretarin e Përgjithshëm të NATO-s, Mark Rutte, presidentin e Këshillit Evropian António Costa dhe presidenten e Komisionit Evropian Ursula von der Leyen. Të martën, lideri ukrainas pritet nga kryeministrja Meloni në Romë.
Turi diplomatik i Zelenskyt vjen pas një serie takimesh midis përfaqësuesve ukrainas dhe amerikanë mbi një “marrëveshje paqeje”.
Takimi në Londër zgjati rreth dy orë dhe u përqendrua në forcimin e mbështetjes evropiane për Kievin, ndërsa bisedimet e udhëhequra nga SHBA-ja për një plan paqeje janë në ngërç, me skepticizëm nga Gjermania ndaj disa propozimeve amerikane.
