Regjisori dhe aktori i njohur hollivudian Rob Reiner dhe bashkëshortja e tij, Michele Reiner, janë gjetur të pajetë në banesën e tyre në Los Anxhelos, në një ngjarje që autoritetet po e hetojnë si vdekje të dyshimtë. Policia dhe zjarrfikësit u thirrën pasditen e së dielës në një zonë luksoze të lagjes Brentwood, e njohur për rezidencat e figurave të famshme.
Sipas policisë së Los Anxhelosit, një burrë 78-vjeçar dhe një grua 68-vjeçare u shpallën të vdekur në vendngjarje. Megjithëse autoritetet nuk i identifikuan zyrtarisht viktimat, një deklaratë e familjes për mediat amerikane konfirmoi se bëhet fjalë për Rob dhe Michele Reiner. “Jemi të shkatërruar nga kjo humbje e papritur dhe kërkojmë privatësi në këtë moment jashtëzakonisht të vështirë,” thuhet në reagim.
Policia bëri të ditur se nuk ka ende persona të arrestuar dhe as të dyshuar, ndërsa detajet mbi rrethanat e vdekjes, plagët e mundshme apo përdorimin e ndonjë arme nuk janë bërë publike. Shkaku i vdekjes pritet të përcaktohet nga zyra e mjekësisë ligjore.
Guvernatori i Kalifornisë, Gavin Newsom, e cilësoi Reiner si një “gjeni zemërgjerë” të kinemasë amerikane, ndërsa ish-presidenti Barack Obama vlerësoi ndikimin e tij kulturor dhe angazhimin për drejtësi sociale.
Rob Reiner ishte një nga emrat më të mëdhenj të Hollywood-it, autor i filmave klasikë si The Princess Bride, When Harry Met Sally, Misery dhe A Few Good Men. Michele Reiner ishte fotografe, producente dhe bashkëthemeluese e një agjencie artistike. Çifti ishte i njohur edhe për angazhimin e tyre në kauza sociale dhe bamirëse.