Administrata Trump njofton se ka vendosur të largojë nga detyra gati 30 diplomatë karriere në një përpjekje të për rifreskuar trupin diplomatik të SHBA-së jashtë vendit, me personel që konsiderohet se mbështet plotësisht prioritetet “Amerika e Para” të Presidentit Donald Trump.
Sipas burimeve nga Departamenti i Shtetit, shefat e misioneve në të paktën 29 vende u informuan javën e kaluar se mandatet e tyre do të përfundonin në janar.
Të gjithë ata e kishin marrë detyrën e tyre gjatë administratës Biden, por i kishin mbijetuar një spastrimi fillestar në muajt e parë të mandatit të dytë të Trump që synonte kryesisht të emëruarit politikë.
Zyrtarët thanë se ata që preken nga ndryshimet nuk do të humbasin vendet e tyre të punës në shërbimin e jashtëm, por do të kthehen në Uashington për pozicionet të tjera, nëse i pranojnë ato.
Afrika është kontinenti më i prekur nga ky vendim ku Departamenti njoftoi ambasadorët në Burundi, Kamerun, Kepi i Gjelbër, Gabon, Bregu i Fildishtë, Madagaskar, Mauritius, Niger, Nigeri, Ruanda, Senegal, Somali dhe Uganda.
E dyta është Azia, me ndryshime ambasadorësh në Fixhi, Laos, Ishujt Marshall, Papua Guinea e Re, Filipinet dhe Vietnami.
Katër vende në Evropë, Armenia, Maqedonia, Mali i Zi dhe Sllovakia janë të prekura si dhe nga dy në Lindjen e Mesme, Algjeria dhe Egjipti.
