Juha Kujala, bari drerësh në Kuusamo, thotë se këtë vit po gjen pothuajse çdo ditë kufoma drerësh të vrarë nga ujqërit.
“Ky vit është më i keqi ndonjëherë në këtë zonë”, shprehet ai, ndërsa qëndron pranë një dreri të vrarë së fundmi.
Sipas tij, humbjet janë veçanërisht të rënda kur preken drerët femra, të cilat sjellin vetëm një këlysh në vit. “Ndihem vërtet keq. Ekuilibri nuk është i drejtë. Ka aq shumë ujqër saqë ata kërcënojnë të gjithë sistemin këtu”, shton Kujala.
Familja e tij merret me mbarështimin e drerëve prej më shumë se 400 vitesh. Përveç kësaj, ai ka zhvilluar turizmin festiv, duke ofruar shëtitje me slita drerësh dhe aktivitete për vizitorët që vijnë në “shtëpinë zyrtare të Santa Claus-it”.
Për turistët, drerët janë magjia e Krishtlindjeve, ndërsa për barinjtë, ata janë mbijetesë ekonomike.
Sipas Ministrisë Finlandeze të Bujqësisë dhe Pylltarisë, vrasja e një dreri femër në kulmin e prodhimtarisë i shkakton pronarit një humbje prej rreth 1,572 eurosh. Barinjtë ankohen se kompensimi shtetëror nuk mjafton dhe se procedurat burokratike u marrin shumë kohë.
Të dhënat zyrtare tregojnë se popullsia e ujqërve në Finlandë është rritur ndjeshëm, nga rreth 295 ujqër në pranverën e vitit 2024 në rreth 430 këtë vit, niveli më i lartë në dekada. Kujala paralajmëron se, pa masa, “brenda pak vitesh zona të tëra do të mbeten pa drerë”, duke vënë në rrezik një nga traditat më të vjetra të vendit.
