Në një mbledhje të UNESCO-s në Nju Dehli, u vendos që gatimet, ritualet dhe zakonet e përgatitjes së ushqimit në Itali të regjistrohen si pjesë e trashëgimisë së pa‑prekshme.
Vendimi vlerëson jo vetëm pjatat ikonike si pasta, pizza apo tiramisu por edhe momentin social të shtruarit të tryezës, drekave familjare të së dielës dhe transmetimin e recetave brez pas brezi.
Kryeministrja italiane, Giorgia Meloni, tha se kjo është një “njohje historike që mbron kulturën dhe identitetin italian”.
Ndërsa, Ministri i Jashtëm, Antonio Tajani, theksoi se ky ishte një sukses që Italia e meritonte. “Falënderoj të gjithë ata që punuan pa u lodhur për këtë arritje. Kuzhina italiane është identitet, është vlerë, është një lidhje që bashkon familjet dhe komunitetet. Çdo recetë është histori, pasion dhe inovacion,” tha ai.
Tajani shtoi se ky vlerësim vjen në një moment kur eksportet agro-ushqimore italiane kanë kapur nivelin rekord prej 68 miliardë euro, duke theksuar se gastronomia është jo vetëm kulturë, por edhe motor ekonomik për vendin.
Ministria e Bujqësisë dhe e Kulturës në Itali njoftoi se aplikimi kishte nisur në 2023‑ën dhe tani arriti suksesin. Ekspertë të gastronomisë dhe kulturës e përshëndetën vendimin si një hap të rëndësishëm për ruajtjen e zakoneve dhe traditave të vjetra.
Sipas dinamikave të UNESCO-s, kjo njohje mund të nxisë turizëm dhe të forcojë vlerësimin ndërkombëtar për vlerat kulturore italiane. Në qendër nuk qëndron receta pas recetës, por respekti për përbërësin, për tokën, për traditën dhe për marrëdhëniet mes njerëzve.
