Prokuroria e Posaçme kundër Korrupsionit dhe Krimit të Organizuar paraqiti të martën, më 23 dhjetor, prova në funksion të gjykimit të çështjes penale ndaj ish-ministrit të Mbrojtjes, Fatmir Mediu, që lidhet me shkaqet që çuan në shpërthimin në Gërdec në vitin 2008.
Prokurori i çështjes, Arben Kraja, konstatoi se në maj të vitit 2008 janë sekuestruar në qendrën e ndërlidhjes së Ministrisë së Mbrojtjes disa komunikime me faks, të kryera nga kjo ministri me institucione të tjera.
Sipas tij, në këtë procesverbal është sekuestruar një faks i dërguar nga Ministria e Drejtësisë drejt Ministrisë së Mbrojtjes, pa numër dhe pa datë, me lëndë “mendim për një projektvendim”. Shkresa është protokolluar në Ministrinë e Mbrojtjes në muajin mars të vitit 2007.
Kraja shpjegoi se në korrespondencën mes Ministrisë së Mbrojtjes dhe asaj të Drejtësisë, kjo e fundit i ka kthyer përgjigje se, lidhur me kërkimin e mendimit për projektvendimin për procedurën e trajtimit të armëve, teknikës dhe pajisjeve të Forcave të Armatosura të hequra nga armatimi dhe përdorimi, parimisht shprehet dakord.
Prokurori Kraja deklaroi se nga këqyrja me sy të lirë e përmbajtjes së dokumentit faks të sekuestruar në Ministrinë e Mbrojtjes konstatohet se, në cepin e majtë të sipërm, është shënuar “për z. Shkëlzen Berisha”.
Sipas Krajës, ky shënim nuk është vendosur me bojë të njomë, por nga këqyrja me sy të lirë duket se ka qenë pjesë e përmbajtjes së dokumentit që është dërguar me faks nga Ministria e Drejtësisë. SPAK kërkon që të pyetet si dëshmitare edhe Anjola Agolli, sekretarja e ish-ministrit të Drejtësisë, Aldo Bumçi.
Në vijim, Kraja renditi një sërë dokumentesh të tjerë, si kërkesa për ndihmë juridike, vendime gjyqësore, procesverbale të këqyrjeve të tabulateve telefonike, etj. Sipas prokurorit, referuar aktit të ekspertimit ushtarak, përmes një vendimi të nëntorit të vitit 2007 të Komisionit të Posaçëm për Kategorizimin e Pajisjeve, janë kategorizuar për shitje municione me kalibër të madh, në tejkalim të një vendimi të qeverisë të marsit 2007.
Kraja tha se rezulton se Mediu ka pasur dijeni për këtë vendim të Komisionit të Posaçëm, si dhe ka qenë i interesuar për ecurinë e procesit të vendimmarrjes.
Përfaqësuesit ligjorë të Mediut, avokatët Henrik Ligori dhe Ardian Visha, kërkuan kohë për të përgatitur qëndrimin e tyre ndaj provave të akuzës dhe gjyqtarja e çështjes, Irena Gjoka, e shtyu seancën për më datë 14 janar të vitit të ardhshëm, në orën 09:00.
Rihapja e çështjes ndaj Mediut u vu në lëvizje pas 12 vitesh, me iniciativën e familjes së një prej viktimave të shpërthimit të marsit 2008 në ambientet e ish-“Brigadës së Tankeve”, ku humbën jetën 26 persona dhe u plagosën qindra të tjerë. Sipas kërkuesve dhe SPAK, pas ndryshimeve ligjore të viteve 2012 dhe 2017, deputeti nuk ka më imunitet parlamentar për ndjekjen penale apo gjykimin e tij dhe, për rrjedhojë, nuk ekziston asnjë pengesë për hetimin dhe gjykimin e Mediut, i cili akuzohet për “shpërdorim detyre”.
Çështja ndaj Mediut kaloi për gjykim më 6 prill të vitit 2023 dhe ndodhet aktualisht në fazën e paraqitjes së provave nga ana e SPAK.
Reporter.al
