Shtetet e Bashkuara të Amerikës gjatë Krishtlindjeve kryen një sulm në Nigeri duke vrarë shumë terroristë të Shtetit Islamik.
Ky sulm ka ardhur me urdhër të presidentit amerikan, Donald Trump, i cili më herët kishte dënuar vazhdimisht sulmet ndaj të krishterëve në vendin afrikan.
“Sonte, nën urdhrat e mia si Komandant i Përgjithshëm, Shtetet e Bashkuara nisën një sulm të fuqishëm dhe vdekjeprurës kundër terroristëve të ISIS në Nigerinë veriperëndimore, të cilët po synojnë dhe vrasin brutalisht, kryesisht, të krishterë të pafajshëm, në nivele të papara në shumë vite, madje edhe shekuj” shkroi presidenti amerikan në Truth Social , me Departamentin e Luftës të SHBA-së që publikoi videon e lëshimit të Tomahaëk nga një aeroplanmbajtëse amerikane.
“I kisha paralajmëruar më parë këta terroristë se nëse nuk do ta ndalonin masakrën e të krishterëve , do ta paguanin shtrenjtë, dhe sonte, kjo është ajo që ndodhi. Departamenti i Luftës ka kryer sulme të shumta perfekte, siç janë të afta vetëm Shtetet e Bashkuara”, shtoi Trump, i cili paralajmëroi se do të kishte më shumë “terroristë të vdekur” nëse “masakra e të krishterëve vazhdon”.
Sekretari amerikan i Mbrojtjes, Pete Hegseth, deklaroi se Shtetet e Bashkuara janë “mirënjohëse për mbështetjen dhe bashkëpunimin e qeverisë nigeriane” në kuadër të operacioneve të përbashkëta të sigurisë. Nga ana e saj, Ministria e Jashtme e Nigerisë konfirmoi se sulmet ajrore u realizuan si pjesë e bashkëpunimit të vazhdueshëm me SHBA-në, i cili përfshin shkëmbimin e inteligjencës dhe koordinimin strategjik për luftimin e grupeve militante.
“Nëpërmjet këtij bashkëpunimi u realizuan sulme ajrore precize kundër objektivave terroriste në pjesën veriperëndimore të Nigerisë”, thuhet në një deklaratë të Ministrisë së Jashtme nigeriane, të publikuar në platformën X.
Presidenti amerikan Donald Trump ka deklaruar më herët se SHBA-ja do të ndërmarrë një ndërhyrje ushtarake “të fortë” në Nigeri, duke akuzuar qeverinë e këtij vendi se nuk ka bërë mjaftueshëm për të ndaluar sulmet ndaj komuniteteve të krishtera nga grupe islamike.
Siç thekson gazeta The Guardian, Nigeria është zyrtarisht një shtet laik, ndërsa popullsia e saj është pothuajse e ndarë në mënyrë të barabartë mes myslimanëve (rreth 53%) dhe të krishterëve (rreth 45%). Dhuna ndaj të krishterëve ka tërhequr vëmendje të gjerë ndërkombëtare, veçanërisht nga qarqe të krahut të djathtë në SHBA, ku shpesh përshkruhet si përndjekje fetare.
Megjithatë, qeveria nigeriane e kundërshton këtë interpretim, duke theksuar se grupet e armatosura sulmojnë si myslimanë ashtu edhe të krishterë. Sipas autoriteteve, pretendimet se dhuna është ekskluzivisht fetare nuk pasqyrojnë realitetin kompleks të situatës së sigurisë dhe shpërfillin përpjekjet e vazhdueshme për mbrojtjen e lirisë fetare. Pavarësisht këtyre dallimeve në qëndrime, Nigeria ka rënë dakord të thellojë bashkëpunimin me SHBA-në për forcimin e kapaciteteve të saj kundër grupeve militante.
