Nga klubet e mbushura plot në Spanjë deri te qendrat e reja që po ndërtohen anembanë Evropës dhe më gjerë, padeli po shndërrohet me shpejtësi në një fenomen global. Dikur një aktivitet pak i njohur që luhej, sot padeli po përhapet me ritme të jashtëzakonshme dhe tashmë praktikohet në rreth 90 vende të botës.
Tërheqja e këtij sporti me raketë që po rritet me shpejtësi qëndron në thjeshtësinë, aksesueshmërinë dhe natyrën e tij sociale. Zakonisht luhet në dyshe, në një fushë kompakte të rrethuar me xhama, ku loja rrallë ndërpritet dhe lojtarët mbeten vazhdimisht të përfshirë – qofshin ata sportistë me përvojë apo fillestarë të plotë.
Kjo shihet qartë në një klub padeli të mbyllur në jug të Spanjës. Që në orën 10:00 të mëngjesit, edhe gjatë ditëve të javës, ambienti është i mbushur me lojtarë. Francis Calvache, trajner padeli dhe lojtari më i renditur në provincën e Almerias, thotë se rritja globale e sportit nuk e surprizon aspak.
“Është relativisht e lehtë ta dërgosh topin nga njëra anë e fushës në tjetrën. Dhe për shkak se ka edhe mure, ke mundësinë që topi të rikthehet dhe loja të vazhdojë, ndryshe nga tenisi”, shpjegon ai.
Padeli lindi në fund të viteve 1960 në Acapulco të Meksikës. Enrique Corcuera, një biznesmen i pasur dhe adhurues i tenisit, nuk kishte hapësirë të mjaftueshme për të ndërtuar një fushë standarde në pronën e tij. Për të mos hequr dorë nga pasioni, ai krijoi një fushë më të vogël të rrethuar me mure, në mënyrë që topi të qëndronte në lojë.
Një mik i tij spanjoll, Alfonso de Hohenlohe-Langenburg, e provoi këtë sport të ri në shtëpinë e Corcueras dhe u magjeps menjëherë. Në vitin 1974, ai ndërtoi dy fushat e para të padelit në një klub tenisi në Marbella të Spanjës, duke i dhënë nisje përhapjes së sportit në Spanjë dhe më pas në vende të tjera spanjisht folëse si Argjentina dhe Uruguai.
Me kalimin e kohës, padeli u bë pjesë e jetës së përditshme në Spanjë, veçanërisht në Andaluzi, ku u zhvendos nga klubet private në parqe publike, komplekse banimi dhe rutina të zakonshme shoqërore.
Sot, Spanja dominon skenën profesionale të padelit: shtatë nga dhjetë lojtarët më të mirë në botë janë spanjollë, sipas Federatës Ndërkombëtare të Padelit (FIP).
Përtej klubeve të mbyllura dhe konkurrencës intensive, padeli ka edhe një dimension tjetër që e bën atë kaq popullor. Në qytetin bregdetar të San Jose-s, një grup grash vendase janë bashkuar së fundmi për të luajtur padel çdo të premte në mëngjes, në një fushë publike në ambient të hapur.
Në nivel global, padeli konsiderohet një nga sportet me rritjen më të shpejtë në botë. Sipas vlerësimeve të federatave kombëtare dhe raporteve të industrisë, dhjetëra miliona njerëz luajnë padel në më shumë se 130 vende.
Përveçse është i lehtë për t’u mësuar, padeli po mbështetet gjithnjë e më shumë edhe nga autoritetet lokale, pasi një fushë padeli është më e lirë për t’u ndërtuar dhe mirëmbajtur krahasuar me një fushë tenisi. Edhe operatorët privatë e kanë përqafuar këtë sport, pasi e njëjta hapësirë mund të përdoret nga më shumë persona dhe të gjenerojë më shumë të ardhura për orë.
Federata Ndërkombëtare e Padelit thekson se sporti është zgjeruar me shpejtësi përtej bastioneve tradicionale si Spanja dhe Argjentina, duke shënuar rritje të fortë në Evropë, Lindjen e Mesme dhe Amerikë.
Në Britani, vetëm gjatë vitit 2025, mbi 400 mijë persona kanë luajtur padel të paktën një herë, sipas vlerësimeve të Shoqatës së Tenisit të Britanisë – një rritje e ndjeshme krahasuar me vitet e mëparshme.
