Partia Demokratike ka reaguar pas publikimit të nga Presidenti Ilir Meta, të disa dokumenteve me të cilat ai akuzoi mazhorancë për kapjen e Gjykatës Kushtetuese.
Sekretari i Përgjithshëm i PD, Gazment Bardhi tha se dokumentet e bëra publike janë tronditëse.
“Qeveria e Edi Ramës me Etilda Gjonajn, Parlamenti i Edi Ramës me Gramoz Ruçin, Këshilli i Emërimeve në Drejtësi i Edi Ramës me Ardian Dvoranin tani janë të provuar me dokumenta zyrtarë se janë pjesë e një organizate mafioze për të asgjësuar pavarësinë e Gjykatës Kushtetuese që në lindje”, thekson Bardhi.
“Dokumentet e bërë publikë nga Presidenti janë tronditës. Qeveria boton në Fletoren Zyrtare një akt për llogari të KED-së, që sipas Kushtetutës është një institucion pa asnjë lidhje me Qeverinë. Është një tjetër akt i paprecedentë që minon ndarjen dhe balancimin mes pushteteve, shtetin ligjor dhe besimin e qytetarëve tek drejtësia, zhbën Reformën në Drejtësi dhe thellon krizën politike dhe institucionale në vend”, përfundon Bardhi./ATSH/
