Michelle Obama surprizon: “Bëra 10 shpime në vesh në një seancë të vetme”
Ish-Zonja e Parë e SHBA-ve, Michelle Obama, ka surprizuar publikun me një rrëfim të pazakontë në podkastin e saj. Në një bisedë të sinqertë me vëllanë e saj, Craig Robinson, ajo zbuloi se ka bërë plot 10 shpime në vesh… të gjitha njëherësh.
“Gjithmonë kam menduar të bëj disa shpime më shumë, por kurrë nuk e kisha realizuar”, tha ajo, duke shtuar se trendi i shpimeve të shumta i dukej një formë e bukur dekorimi. Por ajo që nisi si një ide e vogël, përfundoi në një vendim të guximshëm: “Ndërsa isha ulur aty, i thashë personit që po bënte piercing të shtonte edhe më shumë. Në fund, bëra 10 në një seancë të vetme”.
Rrëfimi erdhi në kuadër të reflektimeve që ajo ka ndarë së fundmi për jetën pas Shtëpisë së Bardhë. Në një intervistë për revistën People, Michelle ka folur edhe për mënyrën si pamja e saj fizike është komentuar dhe analizuar gjatë viteve si Zonjë e Parë, si dhe për lirinë që ndjen sot për të eksperimentuar me stilin.
“Gërshetat më japin liri. Kur nuk jam në publik, notoj, luaj tenis dhe nuk dua të mendoj për flokët”, është shprehur ajo.
Nga një figurë institucionale në Shtëpinë e Bardhë, në një grua që flet hapur për stilin, trupin dhe zgjedhjet personale, Michelle Obama po tregon një anë më të lirë, më personale dhe më autentike se kurrë më parë.
