Bashkëthemeluesja e grupit “Palestine Action” fitoi të premten një sfidë ligjore në Mbretërinë e Bashkuar mbi ndalimin e grupit si një “organizatë terroriste”, transmeton Anadolu.
Huda Ammori e kishte kundërshtuar ndalimin në një gjyq në Gjykatën e Lartë në Londër, ku gjyqtarët vendosën se ndalimi i grupit sipas legjislacionit për terrorizmin ishte i paligjshëm.
Në platformën e kompanisë amerikane të mediave sociale X, Ammori u shpreh: “Gjykata e Lartë vendosi që ndalimi i grupit ‘Palestine Action” është i paligjshëm pasi është disproporcional me lirinë e fjalës dhe Sekretarja e Brendshme shkeli politikën e saj”.
“Gjykata urdhëroi që ndalimi të anulohet. Detajet e heqjes së ndalimit do të vendosen dhe përfundohen në një datë të mëvonshme”, shtoi ajo.
Në përgjithësi, gjykata tha në një përmbledhje të publikuar në faqen e saj të internetit se, ndalimi i grupit ishte “disproporcional” dhe “natyra dhe shkalla e aktiviteteve të tij që bien brenda përkufizimit të terrorizmit nuk kishin arritur ende nivelin, shkallën dhe vazhdimësinë për të justifikuar ndalimin”.
Megjithatë, “Palestine Action” do të mbetet e ndaluar për të lejuar argumente të mëtejshme ligjore, duke përfshirë një apel të mundshëm qeveritar.
Sipas policisë, “Palestine Action” u ndalua në korrik 2025 sipas Aktit të Terrorizmit, pasi anëtarët e grupit hynë në një bazë të Forcave Ajrore Mbretërore dhe lyen dy avionë me bojë, duke shkaktuar dëme prej 7 milionë paundësh (9,44 milionë dollarë). Që atëherë, qindra aktivistë pro-palestinezë janë arrestuar në të gjithë Mbretërinë e Bashkuar.
