Televizioni shtetëror iranian: Khamenei u vra në zyrën e tij
Këshilli i Lartë i Sigurisë Kombëtare i Iranit tha se Ajatollah Khamenei u vra herët të shtunën në mëngjes në zyrën e tij “ndërsa po kryente detyra”.
Duke përdorur imazhe satelitore, BBC Verify konfirmoi më parë dëme të konsiderueshme në disa pjesë të kompleksit të Shtëpisë së Udhëheqjes, që është zyra e Khameneit në Teheran.
Agjencia e Lajmeve Tasnim, e lidhur me Trupat e Gardës Revolucionare Islamike (IRGC), ka thënë se vdekja e Khameneit në zyrën e tij është provë se raportet se ai po fshihej ishin “luftë psikologjike e armikut”.
Ne një deklaratë nga Trupat e Gardës Revolucionare Islamike paralajmërohet se do të sulmojnë bazat amerikane dhe Izraelin.
“Operacioni ofensiv më shkatërrues në historinë e forcave të armatosura të Republikës Islamike të Iranit do të fillojë drejt territoreve të pushtuara dhe bazave terroriste amerikane brenda pak çastesh”, thuhet në të.
Vdekja e udhëheqësit suprem është një moment i madh – dhe Irani po përgjigjet me forcë
Vrasja dje e njeriut që ka sunduar Iranin për gati 40 vjet u konfirmua në televizionin shtetëror gjatë natës. Është një moment i madh për kombin islamik.
Pati disa festime në rrugët e qyteteve iraniane nga ata që e kanë kundërshtuar regjimin e tij. Kjo do të inkurajojë si Izraelin ashtu edhe Shtetet e Bashkuara, të cilat i kanë nxitur iranianët të shfrytëzojnë këtë moment dhe të ngrihen dhe të rrëzojnë qeverinë.
Gjatë natës, ushtria izraelite kreu një valë tjetër bombardimesh, duke synuar, sipas saj, rezervat e raketave balistike të Iranit dhe vendet e lëshimit, si dhe sistemet e tij të mbrojtjes ajrore.
Më shumë se 200 njerëz janë vrarë në të gjithë Iranin, sipas Gjysmëhënës së Kuqe. Trupat e Gardës Revolucionare të Iranit thonë se do t’i përgjigjen vdekjes së udhëheqësit Suprem me operacionin më shkatërrues në historinë e saj.
Këtë mëngjes në Izrael, sirenat e sulmit ajror janë ndezur përsëri, ndërsa Irani vazhdon të qëllojë me raketa balistike. Pothuajse të gjitha janë rrëzuar nga sistemi i mbrojtjes ajrore të Izraelit.
Por disa ia kanë dalë mbanë: në Tel Aviv, një sulm me raketa vrau një grua, viktima e parë izraelite e kësaj lufte. Shërbimi i ambulancës thotë se 120 persona të tjerë janë plagosur, shumica e tyre lehtë.
