Rusia nisi një breshëri dronësh ndaj Ukrainës, duke vrarë katër persona dhe duke dëmtuar objektet e prodhimit të gazit, infrastrukturën portuale, ndërtesat e banimit dhe një spital materniteti, thanë zyrtarët ukrainas të shtunën.
Trupat ruse lëshuan 273 dronë, thanë forcat ajrore ukrainase, duke shtuar se rajoni jugor i Odesës ishte në qendër të sulmeve.
Presidenti Volodymyr Zelensky tha se më shumë se 60 dronë u përdorën gjatë sulmeve ruse në qytetin e Odesës.
“Nuk kishte asnjë qëllim ushtarak, ky ishte terror i pastër kundër jetës së zakonshme civile”, tha Zelensky në aplikacionin Telegram.
Oleh Kiper, guvernatori rajonal, tha se dy persona u vranë dhe 12 të tjerë, përfshirë një fëmijë, u plagosën në sulmet në Odesa.
Një punonjës 55-vjeçar i energjisë u vra kur Rusia goditi objektet e prodhimit të gazit të Ukrainës në rajonin qendror të Poltavas, tha kompania e energjisë Naftogaz.
Një burrë 28-vjeçar u vra gjithashtu në qytetin industrial të Kryvyi Rih në rajonin e Dnipropetrovsk, tha guvernatori. Forcat ajrore thanë se njësitë e mbrojtjes ajrore ukrainase kishin rrëzuar 252 dronë, por 21 dronë kishin goditur objektiva në 18 vende.
Në portin e Odesës në Detin e Zi, sulmet ruse dëmtuan një maternitet, ndërtesa banimi dhe infrastrukturë portuale, thanë zyrtarët rajonalë.
