Prokuroria Publike Europiane ka kërkuar të mërkurën që Greqia të heqë imunitetin e 11 deputetëve për të mundësuar hetimin e rolit të tyre në një skandal mashtrimi me subvencionet bujqësore, që ka shkaktuar dorëheqje politike dhe një gjobë të rëndë nga BE-ja.
Prokurorët evropianë vitin e kaluar ngritën akuza ndaj dhjetëra blegtorëve grekë për falsifikimin e pronësisë së tokave dhe bagëtive, me qëllim të përfitimit të miliona eurove ndihma financiare nga Bashkimi Evropian.
Në qershor, BE-ja gjithashtu gjobiti Greqinë me 392 milionë euro për menaxhimin e dobët të subvencioneve nga agjencia OPEKEPE gjatë periudhës 2016–2023. Kjo agjenci menaxhon mbi 2 miliardë euro ndihma bujqësore vjetore nga BE-ja.
Një ministër dhe katër zyrtarë të lartë të qeverisë së qendrës së djathtë të kryeministrit Kyriakos Mitsotakis dhanë dorëheqjen për shkak të rolit të dyshuar në skandal, i cili ka çuar në një hetim parlamentar.
Sipas zhvillimeve të reja të së mërkurës, Prokurori i Përgjithshëm Evropian ka kërkuar nga parlamenti grek të heqë imunitetin e 11 ligjvënësve aktivë, për të avancuar hetimin.
Hetimi lidhet me dyshimet për vepra penale kundër interesave financiare të BE-së në vitin 2021, përfshirë nxitjen e shkeljes së besimit, mashtrimin kompjuterik dhe deklarata të rreme me qëllim përfitimi të paligjshëm, sipas deklaratës.
Prokurori nuk dha emrat e ligjvënësve, por informacioni i kaluar Parlamentit tregon për përfshirjen e mundshme të një ish-ministri për zhvillimin rural dhe zëvendësit të tij.
