Misioni Artemis II i NASA-s ka nisur zyrtarisht. Katër astronautë janë nisur drejt Hënës për herë të parë në më shumë se gjysmë shekulli.
Raketa “Space Launch System” (SLS) u ndez në Qendrën Hapësinore Kennedy duke transportuar ekuipazhin brenda anijes kozmike Orion.
Ky mision shënon fluturimin e parë të NASA-s me ekuipazh përtej orbitës së Tokës që nga viti 1972 dhe përfaqëson një hap madhor drejt rikthimit të njerëzve në sipërfaqen hënërore.
Në bord të anijes kozmike ndodhen komandanti Reid Wiseman, piloti Victor Glover dhe specialistët e misionit Christina Koch dhe Jeremy Hansen.
Gjatë misionit 10-ditor, ekuipazhi do të udhëtojë rreth Hënës pa u ulur në të, përpara se të kthehet në Tokë.
Ky udhëtim do të shërbejë për të testuar sistemet kritike të nevojshme për misionet e ardhshme në Hënë.
Katër astronautët do ta realizojnë këtë fluturim në një kapsulë me përmasat e një autobusi të vogël, duke shënuar distancën më të largët nga Toka të arritur ndonjëherë nga njerëzit.
Tre nga astronautët ndanë një mesazh para nisjes pak çaste përpara se të fillonte numërimi mbrapsht:
“Ne po shkojmë për familjet tona,” tha piloti Victor Glover.
“Ne po shkojmë për shokët tanë të skuadrës,” tha specialistja e misionit Christina Koch.
“Ne po shkojmë për mbarë njerëzimin,” tha specialisti i misionit Jeremy Hansen.
Disa minuta pas nisjes, ndërsa astronautët filluan të hynin në atmosferën e sipërme të Tokës, komandanti i anijes kozmike Reid Wiseman flet në sistemin e komunikimit. “Pamje e mrekullueshme,” tha ai. “Kemi një pamje të mrekullueshme të Hënës“.
Astronautët do të shohin gjatë këtij udhëtimi pamje që vetëm një numër i vogël njerëzish në histori kanë pasur mundësinë t’i shohin.
Përpara nisjes, NASA raportoi dy çështje teknike që u zgjidhën me sukses. Një problem me baterinë e Sistemit të Ndërprerjes së Nisjes dhe një defekt i mëparshëm me një mekanizëm sigurie në bord nuk penguan dritaren e nisjes.
Ndonëse problemet e tilla janë të zakonshme, shfaqja e tyre kaq pranë kohës së nisjes u konsiderua si një situatë tensionuese për ekipin e operacioneve.
Presidenti Donald Trump uroi ekuipazhin për lëshimin e Artemis II të NASA-s në një postim në Truth Social përpara nisjes. Ai vlerësoi rikthimin historik në hapësir dhe përpjekjen e Amerikës për të udhëhequr garën moderne hapësinore.
“Sonte në orën 18:24 EST, për herë të parë në mbi 50 VITE, Amerika po kthehet në Hënë!” shkroi Trump.
Presidenti e përshkroi Artemis II si “ndër raketat më të fuqishme të ndërtuara ndonjëherë” dhe vlerësoi astronautët që pritet të udhëtojnë më larg në hapësirën e thellë se çdo njeri tjetër më parë.
“Ne po FITOJMË, në hapësirë, në Tokë dhe kudo në mes,” shtoi Trump. “Amerika nuk mjaftohet me konkurrimin, ne DOMINOJMË, dhe e gjithë bota po na vëzhgon“, tha Trump.
Trump gjithashtu lëvdoi NASA-n dhe ekuipazhin e Artemis II, duke shkruar: “Zoti i bekoftë astronautët tanë të jashtëzakonshëm, Zoti e bekoftë NASA-n dhe Zoti e bekoftë Kombin më të madh që ka ekzistuar ndonjëherë.”
Misioni Artemis II do të dërgojë katër astronautë në një udhëtim 10-ditor rreth Hënës, duke shënuar misionin e parë me ekuipazh përtej orbitës së ulët të Tokës që nga epoka e Apollo-s.
