Nënkryetari i Kuvendit, Memli Krasniqi, ka njoftuar se në mbledhjen e Kryesisë së Kuvendit është caktuar mbajtja e seancës së jashtëzakonshme në orën 15:00, me kërkesë të opozitës.
Zyrtari i lartë i PDK-së thotë se në seancën e sotme do të diskutohet për raportet me SHBA-në, që, sipas tij, po i rrezikon Qeveria.
“Në orën 15 do të mbahet seancë e jashtëzakonshme. Një debat parlamentar ku do diskutohet rrezikimi i marrëdhënieve që kjo Qeveri është duke i shkaktuar me partnerin më strategjik të Republikës së Kosovës, me Shtetet e Bashkuara të Amerikës”, ka thënë Krasniqi.
Ai thotë se raportet me SHBA-në nuk kanë qenë asnjëherë më keq dhe se e konsideron katastrofike paralajmërimin e heqjes së trupave amerikane nga Kosova.
“Kjo paraqet pikën më të ulët të raporteve tona me SHBA-në prej që ekziston shteti ynë, bile edhe para kësaj. Nuk mund të qëndrojmë duarkryq ndaj këtyre zhvillimeve pothuajse katastrofike. Për të parandaluar një katastrofë, sepse unë e konsideroj katastrofë nëse tërhiqen trupat amerikanë, kemi vendosur ta ftojmë Qeverinë dhe Kuvendin për të diskutuar”, tha nënkryetari i Kuvendit.
