Përzgjedhësi i Kosovës në futboll, Bernard Challandes ka mbështetur vendimin e UEFA-s për të shtyrë ndeshjet e plejofit për Euro 2020 dhe tërë Evropianin e këtij viti.

UEFA të martën vendosi për të shtyrë ndeshjet e plejofit, që ishte paraparë të zhvillohen në fund të muajit. Po ashtu vendosi që të shtyjë Evropianin për një vit. Ai do të zhvillohet në verën e vitit 2021. Ndeshjet e plejofit do të luhen në qershor, nëse nuk ka keqësim të situatës me koronavirus.

“E kam pritur një vendim të tillë nga UEFA dhe mendoj se është vendimi më i mirë i mundshëm në këtë kohë të vështirë në të cilën nuk duhet të mendojmë vetëm për futbollin. Në qershor, nëse luhen ndeshjet e plejofit, do të jetë mirë. Mbetet të shihet deri atëherë nëse do të ndryshojë situata, por shpresoj të bëhet mirë”, ka thënë Challandes për Koha.net, pak çaste pas vendimit të UEFA-s.

UEFA mbajti një videokonferencë me federatat nacionale anëtare të saj dhe mori vendimin.

Edhe pa koronavirus, Kosova nuk ka qenë në momentin e mirë për të luajtur në mars. Disa lojtarë ende nuk kanë nisur kampionatin e disa të tjerë janë kthyer vonë nga lëndimet që i kanë mbajtur gjatë jashtë fushës.

Ndërkohë një pjesë e lojtarëve të Kosovës, sidomos portierët, nuk kanë hapësirë te skuadrat e tyre.

Deri në qershor shpresohet për situatë më të favorshme.

“Është vendim i mirë sidomos për lojtarët që luajnë në Suedi e Norvegji, pasi shpresoj se kampionati atje do të nis në muajin tjetër. Është i mirë edhe për Arbër Zenelin e Hekuran Kryeziun që do të kenë më shumë kohë për rikuperim”, ka thënë Challandes, raporton Koha.net.