Kreu i La Ligas spanjolle Javier Tebas beson se ligat evropiane do të jenë në gjendje të rinisin në mesin e majit dhe stinori mund të përfundohet, pas shtyrjes së Kampionatit Evropian për shkak të koronavirusit.
“Në mesin e majit besoj se do të rifillojnë gjitha garat evropiane. Të gjitha. Sigurisht, se varet se si zhvillohet situata me këtë pandemi. Mund të jetë edhe më herët se kaq, por kjo është data që po synojmë”, ka thënë Tebas për gazetën “Marca” të mërkurën, transmeton Koha.net.
Sa i përket nëse ndeshjet do të luhen pa shikues, ai ka shtuar: “Gjithçka varet nga autoritetet shëndetësore nëpër shtete. Ne po flasim për oraret e më tepër se 30 ligave. Gjithçka duhet të koordinohet”.
Tebas ka thënë se shtyrja e Euro 2020, që është vendosur nga UEFA të martën, nënkupton se klubet do të jenë në gjendje të përfundojnë stinorët dhe të rinisin stinorin e ardhshëm me kohë.
“Ne nuk duam të ndryshojmë asnjë stinor, nuk kemi menduar për këtë. Në këtë situatë, skenarët që po mendojmë janë afatshkurtër”, ka thënë Tebas.
Tebas po ashtu ka konfirmuar se La Liga a dërguar te klubet sete për testim për koronavirus, në mënyër që lojtarët të testohen.
“Ne i kemi dërguar para se të shpallej gjendja emergjente. Ne kemi kontraktuar një shërbim plotësisht privat dhe kemi vënë këto sete në dispozicion për gjithë ata që i duan, dhe që mendojnë se janë të nevojshme në këtë situatë”, ka thënë Tebas.
Klubi i La Ligas, Rayo Vallecano ka refuzuar këto sete, duke thënë se duhet adresuar te personat që kanë më tepër nevojë.
“La Liga na ka ofruar këto, por ne nuk kemi pranuar ato për arsye mjekësore dhe shëndetësore. Asnjë lojtar nuk ka shfaqur simptome dhe besojmë se njerëzit që janë në gjendje jo të mirë kanë më tepër nevojë për to. Ata njerëz duhet të kenë prioritet”, ka thënë zëdhënësi i klubit David Espinar.
Vendimi i Valladolidit ka ardhur pasi presidenti i Federatës së Futbollit të Spanjës, Luis Rubiales ka kritikuar klubet që kanë testuar lojtarët për virusin.
“Duke e ditur se bëhet fjalë për jetë të njerëzve më është dukur e pavend për të përdorur këto sete testuese te futbollistët, kur ka njerëz që u duhen më tepër. Rezultati për një futbollist është i njëjtë, nëse del pozitiv dhe nuk ka simptome të rënda, atëherë izolohet në shtëpi. Testimi i lojtarëve më është dukur vendim absolutisht jo-patriotik në këto rrethana”, ka thënë Rubiales.