Një turist 18-vjeçar ka humbur jetën në Central Park të Nju Jorkut, pasi një aksident i rëndë me karrocë turistike me kuaj përfundoi në tragjedi.
Sipas dëshmitarëve, karroca po transportonte katër turistë kur kali që e tërhiqte është trembur papritur ndërsa shoferi kishte ndaluar për të bërë një foto. Në atë moment, kafsha ka filluar të vrapojë me shpejtësi dhe shoferi nuk ka arritur ta kontrollojë.
Karroca është përmbysur gjatë lëvizjes së pakontrolluar, duke shkaktuar që pasagjerët të bien në tokë. Viktima, e identifikuar si Romanch Mahajan nga India, ka pësuar lëndime fatale.
Dëshmitarët thanë se pasagjerët kanë bërtitur nga paniku ndërsa karroca tërhiqej me shpejtësi nëpër park. Një dëshmitare tha për mediat lokale se “kali u tremb dhe vrapoi shumë shpejt”, duke shtuar se ka telefonuar menjëherë shërbimet e emergjencës.
Prindërit e viktimës ndodheshin gjithashtu në park dhe kanë parë ngjarjen tragjike të ndodhë para syve të tyre.
Autoritetet po hetojnë rrethanat e aksidentit.
