Një i vdekur dhe 33 persona të prekur është bilanci i 10 ditëve të para të paraqitjes së koronavirusit në Kosovë, nga gjithsej 577 mostra të dyshimta në virusin SARS-CoV-2 nga data 8 shkurt deri më 22 mars.
Personi i parë që humbi jetën nga koronavirusi është një 85 vjeçar nga Dumnica e Podujevës, i cili u varros dje.
Dy rastet e fundit që u paraqitën sot me koronavirus janë: një femër 50 vjeçare nga qyteti i Gjilanit, dhe një 53 vjeçar nga Malisheva.
Por kur është shënuar rast i parë me koronavirus në Kosovë dhe nga cilat komuna vijnë të prekur në Kosovë:
Rasti i parë me koronavirus është shënuar më 13 mars në komunën e Vitisë, ku ishte prekur një 77 vjeçar që kishte qëndruar në Itali.
Pas 10 ditësh nga paraqitja e parë e koronavirusit, gjithsejtë deri tani janë 33 persona të prekur
Komuna e Vitisë dhe e Malishevës janë komunat me rastet më të shumta të prekura, me gjithsej nga 7 persona të prekur me koronavirus.
E treta është është Gjakova me 4 raste.
Prishtina, Podujeva dhe Gjilani janë me nga 3 raste.
Kurse me veç nga një rast të paraqitur janë 6 komuna: Klina, Lipjani, Prizreni, Obiliqi, Theranda dhe Ferizaj.
Instituti Kombëtar i Shëndetësisë Publike në vazhdimësi ka bërë thirrje ndaj qytetarëve që të respektojnë masat e rekomanduara nga ta dhe Ministria e Shëndetësisë, pra të qëndrojnë në shtëpi dhe të mos dalin në rrugë pa arsye.
Ndërkohë përkundër rritjes së numrit të personave të prekur, në vendin tonë ende nuk është shpallur gjendja e jashtëzakonshme.
Presidenti i vendit, Hashim Thaçi dhe kryeministri Albin Kurti nuk po pajtohet për shpalljen e gjendjes së jashtëzakonshme. I pari ka kërkuar një gjë të tillë, por i dyti vazhdon të insiston se nuk ka ende nevojë për të marrë një masë të tillë.
