Manchester City ka njoftuar se nuk do të pushojë përkohësisht punëtorët në dëm të taksa paguesve, pasi një numër i klubeve kanë përfituar nga skema e qeverisë britanike për të mbuluar pagat e një pjese të stafit gjatë pandemisë, shkruan agjencia AFP.

Të shtunën, lideri i Premier Leagues, Liverpooli është bërë klubi i pestë i elitës angleze që ka njoftuar se ka vendosur në pushim të përkohshëm një pjesë të stafit, ku nuk përfshihen lojtarët, duke aktivizuar skemën qeveritare, që nënkupton se 80 për qind të pagave do të mbulohen nga taksa paguesit.

Ka pasur kritika nga ish-futbollistë, që po thonë se kjo skemë nuk po përdoret si duhet.

Tottenhami, Newcastle Unitedi, Norwich City dhe Bournemouthi, po ashtu kanë përdorur këtë opsion.

“Ne mund të konfirmojmë, pas një vendimi nga kryetari dhe bordi javën e kaluar, se Manchester City nuk do të përdorë skemën qeveritare për mbajtjen e vendeve të punës. Ne mbesim të përkushtuar të mbrojmë njerëzit tanë, punën e tyre dhe biznesin tonë, por njëkohësisht të bëjmë çfarë të mundmi për të përkrahur komunitetin e gjerë në një kohë aq sfiduese për të gjithë”, është thënë në komunikatë të Cityt.

Liverpooli, që do të mbulojë 20 për qind të pagave të stafit që ka pushuar përkohësisht, është kritikuar nga ish-futbollistët si Jamie Carragher, Dietmar Hamann e Stan Collymore për vendimin e marrë.