Klubet e Premier Leagues mund të përdorin zhurmë false në stadiume nëse ndeshjet do të luhen pa praninë e shikuesve, ashtu si pritet.
Brightoni është një prej klubeve që ka diskutuar për të lëshuar zëra artificial në tentim për të përmirësuar atmosferën në stadium.
Sipas The Times, klubet e elitës angleze po eksplorojnë mënyra për të minimizuar humbjen e avantazhit të paraqitjes si vendas, nëse ndeshjet do të luhen pa shikues në stadiume.
Pasi futbolli në Angli të vazhdoj, pritet që ndeshjet të luhen në stadiume të zbrazëta. Ka gjasë që klubet të mbulojnë shumicën e ulëseve të zbrazëta.
“Ne kemi filluar të mendojmë nëse mund të veshim stadiumin. Po mendojmë nëse mund të bëjmë stadiumin më të mirë se vetëm ulëse të kaltëra e të zbrazëta. Duhet të shikojmë nëse mund të ofrojmë zhurmë në ndonjë mënyrë. Duhet të shqyrtojmë nëse këtë e duan njerëzit në shtëpitë e tyre dhe a e pranojnë transmetuesit”, ka thënë shefi ekzekutiv i Brightonit, Paul Barber.
“Më pas vijnë sfidat operacionale. Si do të funksiononte sa i takon shërbimeve emergjente. Gjëja e fundit që duam është të bëjmë më shumë presion te to. Ne jemi përshtatur shumë shpejtë me situatën dhe do të përshtatemi edhe me ndeshjet pa shikues. Do të jetë çuditshëm dhe jo futbolli që jemi mësuar, por nëse është mënyra e vetme për të vazhduar, ne do të pranojmë atë”.
Ndeshjet e para të Premier Leagues mund të luhen më së shpejti më 8 qershor. Kjo do të ndodhë nëse situata përmirësohet sa i takon pandemisë dhe skuadrat fillojnë me stërvitje në mes të majit. Skuadrat angleze janë të përkushtuara për të përfunduar edicionin.
