Një zyrtar i lartë shëndetësor në Itali ka thënë se rreziku që koronavirusi të përhapet përmes ndeshjeve të futbollit është fare i vogël.
Kryetari i Këshillit të Lartë Shëndetësor, Franco Locatelli ka komentuar për këtë çështje gjatë një konference të mbajtur të enjten mbrëma, kur është pyetur për vazhdimin e kampionatit në Itali.
“Nuk mendoj se futbolli mund të përfaqësoj mjet për përhapje të koronavirusit, kur aty janë 22 lojtarë, gjashtë që mund të aktivizohen dhe tre referë”, ka thënë Locatelli. “Duhet të ketë kontakt të fortë dhe ky nuk është kontakt mjaftueshëm i fortë”.
Futbolli është sport i kontaktit, por plani është që kampionati në Itali të vazhdojë duke organizuar testime të rregullta. Përmes tyre do të konfirmohet që lojtarët nuk janë të infektuar, para se ata të paraqiten në fushën e blertë.
Serie A është e interesuar që skuadrat të kthehen në stërvitje më 4 maj, kur Qeveria e Italisë pritet të marr vendim për të lehtësuar masat që kanë të bëjnë me lëvizjen. Numri i të prekurve nga koronavirusi ka rënë së fundi në Itali.
Një protokoll është përgatitur për atë se si skuadrat mund të kthehen në stërvitje dhe eventualisht edhe në ndeshje, duke përfshirë testimin e rregullt të lojtarëve dhe stafit dhe duke mbajtur distancën sociale të paktën në javën e parë.
