Superylli i Juventusit, Cristiano Ronaldo e ka planin të tejkalojë rekordin e golave të Peles dhe të bëhet “më i madhi i të gjitha kohërave”.
Kështu të paktën ka thënë Gary Neville, ish-bashkëlojtari i Ronaldos te Manchester Unitedi.
Ronaldo ka karrierë shumë të suksesshme në nivelin më të lartë, ku është për 18 vjet. Gjatë kësaj kohe ai ka stabilizuar veten si njëri prej më të mirëve të gjeneratës.
35-vjeçari ka fituar tre tituj të Premier Leagues, dy të La Ligas, një të Serie A dhe pesë trofe të Evropës gjatë karrierës te Manchester Unitedi, Real Madridi dhe Juventusi. Ai po ashtu ka fituar pesë trofe të Topit të Artë.
Ai u largua nga Madridi në vitin 2018 si golashënuesi më i mirë në histori të klubit. Ka numrin më të madh të golave prej të gjithë lojtarëve të Portugalisë, me të cilën ka fituar Evropianin e vitit 2016.
Lionel Messi konsiderohet nga shumica si lojtari më i talentuar i dy dekadave të fundit, por Ronaldo shihet si rival i madh i tij dhe nuk e ka ndërmend të ndalet.
Neville ka treguar se si portugezi ka punuar shumë prapa skenës gjatë kohës në Old Trafford dhe beson se ish-kolegu i tij është tani i fokusuar që të matet me legjendën braziliane Pele.
Besohet se ish-fituesi i Kupës së Botës mban rekordin për më së shumti gola në karrierë, mbi një mijë. Por Neville mendon se Ronaldo nuk do të ndalet nga asgjë për të arritur shifrën e brazilianit.
“Përpjekja e tij për t’u bërë më i miri në botë ishte e jashtëzakonshme. Ai është prej pak lojtarëve me të cilët kam luajtur e që publikisht kanë pranuar se trofetë individualë janë të rëndësishëm për ta”, ka thënë Neville për Sky Sports.
“Ai vetëm ka dashur të bëhet më i miri dhe ajo që ka arritur gjatë viteve është e jashtëzakonshme. Të arriturat e tij janë të mahnitshme dhe ai ka punuar shumë për to. Ai ishte i obsesionuar me shënimin e golave dhe për të përmirësuar veten çdo ditë. Ai ka ngritur shkallën e profesionalizmit çdo vit. Unë mendoj se ai ka një plan për të thyer rekordin e Peles. Ai dëshiron të jetë më i madhi i të gjitha kohërave dhe ky është qëllimi i tij i vetëm”.
