Agjenti i futbollit Gary Williams është duke punuar në një ide të madhe që të përfundohet pjesa e mbetur e edicionit në Premier Leaguen e Anglisë në futboll në Australi, shkruan BBC.
Ai llogaritë se rreth 1500-2000 persona do të udhëtonin, pra rreth 75 nga secili klub. Do të kontrolloheshin për koronavirus para se të rezervonin një fluturim direkt nga Londra për në Perth dhe të gjithë ata që udhëtojnë duhet të izolohen në hotele në ardhjen në Australi.
“Kam kontaktuar disa klube të Premier Leagues për të parë se çfarë mendojnë për idenë. Mora përgjigje shumë pozitive. Me të marrë këto përgjigje pozitive nga klubet, unë fola me një senator federal këtu në Australi dhe po ashtu me ministrin e sportit për të parë nëse është e mundur. Ata e panë si të mundshëm. Ministri federal i shëndetësisë në radio tha sot se nëse aplikohen të gjitha protokollet e kërkuara shëndetësore atëherë do të jepte përkrahjen. Ka më pak kufizime këtu. Nuk ka raste të reja në pesë ditë në Perth dhe ka vetëm 19 raste aktive në shtet”, ka thënë Williams për BBC Radio.
Klubet e Premier Leagues janë pajtuar më herët që të zhvillohen ndeshjet në fusha neutrale, por klubet që po rrezikojnë mbijetesën në elitë, kanë kërkuar që të mos ketë largime nga elita këtë stinor.
Nuk po arrihet një pajtim i përgjithshëm, pasi që klubet që gjenden në pjesën e epërme të tabelës po kërkojnë që të mbahet sistemi i njëjtë i garave dhe të ketë largime nga elita.
