Stinori 2019-20 i Premier Leagues mund të anulohet nëse klubet nuk pajtohen që të zhvillohen ndeshjet në terrene neutrale, ka thënë shefi ekzekutiv i Asociacionit të Menaxherëve të Ligës (LMA), Richard Bevan, njofton BBC.
Premier League është pezulluar që nga 13 maji për shkak të pandemisë së koronavirusit.
“Koha nuk është në anën tonë dhe stërvitjet duhet të fillojnë sa më shpejt, në mënyrë që të mund të rifillohet me ndeshje më 12 qershor”, ka thënë Bevan.
Gjitha klubet janë pajtuar që të luhen 92 ndeshjet e mbetura të stinorit 2019-20 nëse është e sigurt të luhet.
Mirëpo, Brightoni ka thënë se nuk është që ndeshjet të luhen në fushë neutrale, pasi mund të prek integritetin e ligës.
Propozimi i stadiumeve neutrale duhet të marrë aprovimin e 14 prej 20 klubeve të elitës për t’u pranuar.
Aston Villa të mërkurën po ashtu ka dal kundër që ndeshjet të luhen në terrene neutrale.
Kryeministri i Britanisë, Boris Johnson pritet të dielën të njoftojë për planet për zbutjen e masave kufizuese.
I pyetur nëse votimi kundër terreneve neutrale do të qonte në anulimin e stinorit, Bevan për “BBC Radio 4”, ka thënë: “Po, mendoj se kjo është korrekte. Qeveria, nëse nuk e ka bërë të qartë tashmë, do ta bëjë të qartë se ndeshjet si vendas në stadiume në vende shumë të populluara, vërtetë vë në dyshim nëse distanca sociale mund të mbahet”.
Plani i Premier Leagues – i emërtuar “Projekti Rifillimi” – përfshinë rifillimin e ndeshjeve në qershor, në mënyrë që kampionati të përfundohet në fund të korrikut, sipas planeve të UEFA-s.
Për të ndodhur kjo, do të duhet fillimi i stërvitjeve të plota më 18 maj.
Ligës po ashtu i duhen për të bërë deri 40 mijë testime për lojtarët dhe stafin, nëse planifikon që të zhvillohen gjitha ndeshjet pa shikues.
Të premten, krerët e Premier Leagues shprehën angazhimin e tyre për të përfunduar kampionatin kur të jetë e sigurt dhe e përshtatshme.
Një numër i mjekëve të klubeve të Premier Leagues kanë ngritur shqetësimin me krerët e ligës për planet për të rifilluar stinori.
“Protokollet mjekësore dhe operuese do t’i paraqiten menaxherëve në video-konferencë e po ashtu edhe lojtarëve. Shpresoj të ketë një zgjidhje që krijon ambient të sigurt”, ka thënë Bevan.
