Duke pirë kafe – nga filxhani në të cilin shkruante: “Shumë skenar i mirë, Paul. Por, kjo asnjëherë nuk do të shitet” – skenarist, producent e regjisori i njohur, Paul Haggis, është shfaqur në masterklasën online të enjten në kuadër të edicionit të parë të festivalit ndërkombëtar të filmit studentor “Cine UP”.
Kishte një arsye përse ua tregoi këtë filxhan më shumë se 40 pjesëmarrësve në mastërklasën e tij online. Kështu i ishte thënë për skenarët e filmave “Million Dollar Baby” e “Crash”, me të cilët më vonë mblodhi disa çmime në festivale të kategorisë A. Sipas tij, një dëshmi për studentët se çdokush mund t’ia arrijë të realizojë ëndrrat. Biseda e tij, me studentët e Kosovës, ishte e sinqertë që në fillim.
“Të gjitha këshillat që ua jap janë nga eksperienca ime. Kam bërë shumë gabime, por kështu kam mësuar”, ka thënë ai. U ka treguar studentëve për rutinën e tij, momentet kur përjeton “bllokadë” e nuk di se çfarë të shkruajë, për dallimin në mes të bërit regji të një filmi e të shkruarit skenar, dhe për rëndësinë që ka pyetja: Pse? Sipas tij, çdoherë një skenarist duhet ta pyesë veten se pse personazhi po vepron në mënyrë të caktuar. Kështu, sipas tij, do të ketë kuptim tregimi e nuk do të jetë i mbushur me veprime që janë klishe. Sipas tij, çdoherë një skenarist duhet ta vërë veten brenda personazheve, madje ka rekomanduar personazhin e lig. Kështu do të nxirret më e mira e tregimit. Për studentët ka pasur edhe një porosi, e që, sipas, tij është më e rëndësishmja. U ka kërkuar që të ndjekin heronjtë e Kosovës nëse duan të kenë sukses.
“Mos shikoni nga njerëzit e Hollywoodit për eksperiencë e as mos shikoni nga unë. Shikoni profesorët tuaj, regjisorët tuaj dhe puna që po bëhet atje. Ata janë heronjtë e juaj”, ka thënë ai.
Paul Haggis është skenarist, producent dhe regjisor i filmit dhe televizionit. Masterklasa ishte pjesë e festivalit “Cine UP”, që nisi të martën e po mbahet online deri më 10 maj për shkak të pandemisë së virusit COVID-19. Ani pse është cilësuar si ndërkombëtar, sivjet janë vetëm studentët vendorë ata që marrin pjesë me mbi 30 vepra filmike. Në mot do të ndërkombëtarizohet.
Haggis njihet më së miri si skenarist dhe bashkëproducent i filmit “Million Dollar Baby” (2004), që është fitues i katër çmimeve “Oscar”, përfshirë atë për filmin me të mirë dhe çmimin për aktoren me të mirë që e mori aktorja Hilary Swank. Ai po ashtu është producent, skenarist dhe regjisori i filmit “Crash” (2005), që në mesin e çmimeve numëron edhe tri çmime “Oscar” dhe dy çmime B”AFTA”. Haggis gjithashtu është njëri nga skenaristët e filmit “Flags of Our Fathers” (2006) dhe filmat për James Bondin “Casino Royale” (2006) dhe “Quantum of Solace” (2008).
Sipas Haggisit, skenaristët duhet që të kenë parasysh se gjithçka duhet të përfshihet në tregim për një arsye. Gjithçka, sipas tij, duhet që të bazohet te karakteret, të cilat edhe e ndërtojnë rrëfimin, por duhet ditur edhe kur duhet hequr dorë nga karakteri në të mirë të tregimit. Sipas tij, bashkëjetesa e tyre është një luftë brenda autorit. Për të, gjatë shkrimit të skenarit, duhet qenë në gjendje që tregimi të ndahet në copëza dhe të bëhet bashkë përsëri.
“Gabimi më i madh që kam bërë është që i kam marrë parasysh fjalët e njerëzve dhe çfarë ata dëshironin. Posa fillova që t’i bëja gjërat sipas dëshirës sime e pasi që i kuptova aftësitë e mia, arrita që të krijoja filma të suksesshëm”, ka thënë ai. I ka këshilluar studentët, pjesëmarrës në masterklasë bashkë me disa nga profesorët e tyre, që asnjëherë të mos bëjnë filma komercialë, por të nisen që të bëjnë filma të mirë e që, sipas tij, nëse ia dalin të jenë komercialë nuk është diçka e keqe.
